Toshkentda va barcha viloyat markazlarida beshinchi avlod 5G standartidagi stansiyalar o‘rnatiladi

Toshkentda va barcha viloyat markazlarida beshinchi avlod 5G standartidagi tayanch baza stansiyalari o‘rnatiladi. Bu haqda «O‘zbektelekom» rahbariyati va mutasaddilari ishtirokida o‘tkazilgan matbuot anjumanida ma’lum qilindi.

ShHT Samarqand sammiti doirasida «O‘zbektelekom» Xitoy kompaniyalari bilan respublikada telekommunikatsiya infratuzilmasini rivojlantirish bo‘yicha qiymati 506,8 mln AQSh dollariga teng 4 ta investitsiya loyihasi ijrosi yuzasidan kelishuvga erishdi.

Mazkur loyihalarni amalga oshirish bo‘yicha Huawei va ZTE korporatsiyalari «O‘zbektelekom» o‘rtasida jami 8 ta shartnoma imzolandi. Loyihalar tatbiq etilishi natijasida:

aholi telekommunikatsiya xizmatlaridan foydalanish imkoniyatlari va qamrovi yanada kengaytiriladi;
ko‘rsatilayotgan xizmatlar sifati oshiriladi;
xalqaro ahamiyatga ega magistral avtomobil yo‘llari bo‘ylab yuqori tezlikdagi mobil internet bilan to‘liq qamrab olishga;
respublika bo‘ylab temiryo‘llarda yuqori tezlikdagi mobil internet bilan to‘liq qamrab olishga;
Toshkent shahrida va barcha viloyatlar markazlarida beshinchi avlod 5G standartidagi tayanch baza stansiyalari o‘rnatishga;
ma’lumotlarni uzatish va magistral transport tarmoqlari o‘tkazuvchanlik qobiliyatini kengaytirishga erishiladi.