Oliy va o‘rta maxsus ta’lim vazirligining sayyor Hay’at yig‘ilishi Qashqadaryoning Ko‘kdala tumanida o‘tkazildi

Kuni kecha Qashqadaryo viloyati Ko‘kdala pedagogika kollejida Oliy va o‘rta maxsus ta’lim vaziri A.Toshqulov raisligida barcha davlat oliy ta’lim muassasalari rahbarlari, sohaning mas’ul vakillari va OAV xodimlari ishtirokida sayyor Hay’at yig‘ilishi bo‘lib o‘tdi. 

Yig‘ilish «Yashil makon» umummilliy dasturi ijrosi, talabalar bandligini ta’minlash, kuz-qish mavsumiga tayyorgarlik hamda oliy va professional ta’lim integratsiyasi masalalariga bag‘ishlandi.

Dastlab, bugungi sayyor yig‘ilishning aynan Ko‘kdala pedagogika kollejida o‘tkazilgani bejiz emasligiga to‘xtalinib, "boisi, mazkur kollejning bu boradagi tajribasi bilan o‘rtoqlashish, amalga oshirilgan ishlarni joyida ko‘rib, yaxshi tomonlarini boshqa hududlarda ham joriy etish", – dedi vazir. 

Qayd etilganidek, bu yerda «Yashil makon» umummilliy dasturi doirasida e’tiborga molik ishlar amalga oshirilgan, kollej hududida 100 ming tupdan ziyod mevali va manzarali daraxtlar o‘tkazilib, hudud aholisi salqinlik va kislorodga to‘yingan toza havo bilan ta’minlangan. 

Umuman, mazkur aholi punktida «yashil bog‘» yaratish, uni parvarishlash va ko‘kalamzorlashtirish borasida tajriba shakllanib, yaxshi maktab yaratilgan. 

Ma’lumotlarga ko‘ra, oliy, o‘rta maxsus va professional ta’lim muassasalari hududlarida 2021 yil kuz va 2022 yil bahor mavsumlarida jami 2 mln 840 ming 696 dona manzarali, mevali daraxt hamda buta ko‘chatlari ekilgan.

Tizimli yo‘lga qo‘yilgan mazkur ishlarni davom ettirish maqsadida ko‘p mablag‘ va ortiqcha mehnat talab qilmaydigan, 5-6 yildan so‘ng yaxshi daromad manbai bo‘ladigan terak ko‘chatlari va qalamchalarini barcha professional va oliy ta’lim muassasalarida kamida 5 ming donadan ekish bo‘yicha aniq vazifalar berildi.

Vazir oliy va professional ta’lim integratsiyasi masalasiga ham to‘xtalib, iqtisodiyot tarmoqlarining turli sohalariga o‘rta bo‘g‘in kadrlar tayyorlashda metodik ko‘mak ko‘rsatish maqsadida 208 ta texnikum 70 ta OTMga biriktirilganini ta’kidladi. 

Keyingi masala davlat rahbari tomonidan joriy yil oxiriga qadar quyosh panellari va quyosh suv isitish qurilmalarini barcha oliy ta’lim muassasalariga joriy etish bo‘yicha berilgan topshiriqlari ijrosi bo‘ldi. 

Ma’lum qilinishicha, bugungi kun holatiga ko‘ra 34 ta oliy ta’lim muassasasida 1 704,5 kVt quyosh panellari, 31 000 litr quyosh suv isitish qurilmalari, 872 dona quyosh panelli tashqi yoritish chirog‘i o‘rnatilgan. 

16 ta oliy ta’lim muassasasi tomonidan zarur uskunalar xarid qilish uchun ishlab chiqaruvchi korxonalar bilan shartnomalar imzolangan.

Ammo shunga qaramasdan, ayrim oliy ta’lim muassasalari tomonidan ushbu topshiriq yuzasidan bugungi kunga qadar birorta ish qilinmagani tanqid qilindi. 

Ularga muqobil energiya manbalarini o‘rnatish ishlarini joriy yil yakunini kutmasdan qisqa muddatlarda bajarish uchun barcha zaruriy choralarni ko‘rishlari topshirildi.

Shundan so‘ng, vazir o‘rinbosari Sarvarxon Buzrukxonov talabalar bandligini ta’minlash, kuz-qish mavsumiga tayyorgarlik masalalarida olib borilayotgan ishlar borasida ma’lumot berdi.

Ayni paytda oliy o‘quv yurtlarida 3,5 mingtadan ortiq to‘garak va klublar faoliyat ko‘rsatmoqda. Ularga a’zo talabalar soni 350 ming nafarni tashkil etadi. 

Bugungi kunda ishlash va qo‘shimcha daromad topishga ehtiyoji bor 35 ming nafar (3 ming 525 nafari chin yetim, nogiron) talaba ish bilan ta’minlandi. 

Ammo bu vazifalarni amalga oshirish jarayonida kamchilik va muammolar ham yo‘q emas, – deydi vazir o‘rinbosari. 

Barcha oliygohlar rahbarlari shaxsan o‘zlari bosh bo‘lib, har oyda bir marta talabalar bandligi, 5 muhim tashabbus doirasida tashkil etilgan to‘garak va sport seksiyalari faoliyati, jinoyatchilik hamda huquqbuzarliklar holati, profilaktika inspektorlari, tyutorlar faoliyatini muhokama etib borishi topshirildi. 

Oliy ta’lim muassasalarida 1 oktyabrga qadar kuz-qish mavsumiga tayyorgarlik ko‘rish va uni betalafot o‘tkazish bo‘yicha tegishli topshiriqlar berilgan edi. Ammo bugunga qadar 18 ta oliy ta’lim muassasasi topshiriqni o‘z vaqtida bajarmagan.

Kuz-qish mavsumiga tayyorgarlik ishlarini jadallashtirish va 20 oktyabrga qadar to‘liq yakuniga yetkazish choralarini ko‘rish topshirildi.

Yig‘ilishdan so‘ng vazir A.Toshqulov boshchiligida barcha mehmonlar mazkur ta’lim dargohida yaratilgan «yashil bog‘» bilan yaqindan tanishdi. O‘rnak olishga arzirli ishlarni alohida e’tirof etib, yaxshi niyat ila kollej hovlisida yangi daraxt ko‘chatlarini o‘tqazishdi.