YTH qurbonlaridan biri 19 kunlik kuyov. Poytaxtdagi ayanchli YTH bo‘yicha yangi tafsilotlar ma’lum bo‘ldi

Mudhish yo‘l-transport hodisasida jabrlangan ikki nafar shaxs ayni paytda Respublika shoshilinch tibbiy yordam ilmiy markazining jarrohlik bo‘limida davolanmoqda. Jabrlanuvchilardan biri avariya vaqtida Nexia-3 avtomobilining orqa qismida bo‘lgan yo‘lovchi bo‘lib, markaz neyroxirurgi Doniyor Isroilov ushbu bemorning holati haqida quyidagilarni ma’lum qildi.

“Bemor bosh miya jarohati, bosh miya chayqalishi tashxisi bilan yotqizilgan. Markazimizda u kerakli barcha tekshiruvlardan o‘tkazilib, zarur davolash muolajalari tayinlangan. Nazoratda bo‘lgan davrda bemorda miya simptomlari ancha kamaygan. O‘zini yaxshi his qilmoqda”, deya Doniyor Isroilovning so‘zlarini keltirmoqda Kun.uz muxbiri.

Shu o‘rinda qiziq bir holat. Toshkent shahar ichki ishlar bosh boshqarmasi Yo‘l harakati xavfsizligi boshqarmasi 9 oktyabrda sodir bo‘lgan avariya haqida ma’lumot berarkan, hodisa oqibatida halok bo‘lganlarning biri Nexia-3 haydovchisi ekani haqida xabar bergandi. Buni ushbu yo‘l-transport hodisa haqida turli nashrlarda chiqqan xabarlar ham tasdiqlaydi.

Biroq surishtiruvlarimiz davomida bu ma’lumot noto‘g‘ri ekani ma’lum bo‘ldi. Avariyada halok bo‘lganlarning har ikkisi Nexia-3 yo‘lovchisi bo‘lib, hodisada og‘ir jarohat olgan haydovchi hozir shifoxonada davolanmoqda.

“Markazimizga olib kelingan vaqtda bemorda ko‘krak qafasi yopiq jarohati, 9 va 10-qovurg‘alar hamda bel umurtqasining sinishi, bosh miya chayqalishi aniqlangan. Shu tashxislar bilan bemor shifoxonamizga yotqizilgan. Hozirgi kunda u kerakli muolajalarni olmoqda. Ahvoli qoniqarli. Bemorning hayotiga xavf soluvchi omillar yo‘q”, deydi Jamshid Jabborov.

Hozirgi vaqtga kelib Toshkent shahar IIBB YHXB o‘zi tarqatgan xabarni tahrirlab, matndan haydovchi vafot etganiga oid ma’lumotni olib tashlagan. Biroq xabarning dastlabki varianti Toshkent shahar ichki ishlar bosh boshqarmasi Telegram-kanalida saqlanib qolgan bo‘lib, unda vafot etganlarning biri haydovchi ekani qayd etilganini ko‘rish mumkin.

Shuningdek, Toshkent shahar IIBB YHXB axborot xizmati rahbari Qahramon Xudoyberganov hodisa vaqtida Nexia-3’da besh kishi bo‘lganini aytgandi. Biroq avariya payti mashinada bo‘lgan yo‘lovchilardan biri bu ma’lumotni rad etdi.

“Akamlar bilan “Tapoich”dan uyga qaytayotgandik. Men mashinaning orqa o‘rindig‘ida o‘tirgandim, haydovchining orqa tarafida. Mashinada men bilan birga 4 kishi bor edi. Yo‘lda uxlab ketayotgandim. Avariya bo‘lganini bilmay qoldim. Mashinadan tushib, “shok” holatida ozroq o‘tirdim. Akamlarning tepasiga bordim. Shu bilan meniyam shifoxonaga olib ketishdi. Keyin nima bo‘lganini bilmayman”, deydi YTH natijasida jabrlangan yo‘lovchi.

Hodisa tafsilotlarini surishtirayotgan vaqtimizda Toshkent shahar ichki ishlar bosh boshqarmasi boshqaruvni yo‘qotib, mudhish yo‘l-transport hodisasiga va ikki kishining o‘limiga sababchi bo‘lgan BMW haydovchisining intervyusini e’lon qildi.

“Uchinchi qatorda ketayotgandim. O‘rtada ketayotgan Gentra yo‘limga chiqdi. Men o‘rta “polosa”ga qochdim. U keyin yana joyiga qaytgisi kelib qoldi. Shu payt meni siqib qo‘ydi, tormoz bosdim, uyog‘ini bilmayman. Mashina suzib ketib qoldi. Keyin tepaga chiqib ketdim. Hushimga kelgach, mashinani o‘chirdim. Marhumlarning yaqinlari, oila a’zolaridan uzr so‘rayman. Men uydan bunday bo‘lishini xohlab chiqmaganman”, — deydi u.

Ijtimoiy tarmoqlarda 9 oktyabr kuni ro‘y bergan avariyaga sababchi bo‘lgan BMW’ga oid boshqa videolar ham tarqalmoqda. Mashinaning raqami va tusi Maxtumquli ko‘chasida yo‘l-transport hodisasiga uchragan, hozirgi vaqtda jarima maydonida saqlanayotgan avtomobilniki bilan bir xil.

Kun.uz muxbiri ayanchli avtohalokat natijasida dunyodan ko‘z yumgan insonlarning xonadonlarida ham bo‘lib, marhumlarning yaqinlari bilan suhbatlashdi.

“Yigirma olti yil. Oramizda eng oxirgi uylanganlardan biri edi. Yaqinda uylantirgandik. Chillasi ham chiqmagandi. Eng og‘ir tomoni ham shu”, deydi marhumning do‘sti Behro‘z O‘ktamov.

“Eng yaxshi ko‘radigan jiyanim edi u. Ukamday ko‘rardim. Hammaga yordam berib yurgan inson edi. Hech kimning ko‘ngliga ozor bermagan. Oilada to‘rtta farzand: uch qiz va bir o‘g‘il. Marhum oilaning yagona boquvchisi edi. Haligacha ishonmayapman. O‘n to‘qqiz kunlik kuyov edi. Iltimos, yo‘llarda harakatlanganda to‘g‘ri yuringlar” deydi marhumning qarindoshi Sherzod Shonazarov.

Eslatib o‘tamiz, insonlar o‘limiga sababchi bo‘lgan YTH bo‘yicha Toshkent shahar IIBB Tergov boshqarmasi tomonidan Jinoyat kodeksining 266-moddasi 3-qismi bilan jinoyat ishi qo‘zg‘atilgan. Ayni paytda tergov harakatlari olib borilmoqda.