Yevropa ittifoqi davlatlari ukrainalik qochqinlar uchun yana 3,5 milliard yevro oladi

Ukrainalik qochqinlarni qabul qilgan Yevropa ittifoqi davlatlari ularni saqlash uchun qo‘shimcha 3,5 milliard yevro oladi. Mablag‘lar Yevropa mintaqaviy rivojlanish jamg‘armasi deb ataladigan fonddan olinadi. YeI davlatlari bu haqda 13 oktyabr, payshanba kuni Yevrokomissiya taklifini ma’qullash orqali kelishib oldi. Yevropa parlamenti avvalroq bunga ruxsat bergandi.

Joriy yilning aprel oyida Yevropa ittifoqi davlatlari Ukrainadan kelgan qochqinlarni joylashtirish uchun 3,4 milliard yevro oldi. O‘shanda mablag‘lar koronavirus inqirozi oqibatlarini bartaraf etish uchun yaratilgan React-EU-Paket jamg‘armasidan ajratildi. Ular birinchi navbatda Ukraina bilan chegaradosh davlatlar uchun mo‘ljallangan edi, chunki ular eng ko‘p qochqinlarni qabul qilishgan. BMT ma’lumotlariga ko‘ra, Rossiya va Ukraina o‘rtasidagi urush paytida 7,6 milliondan ortiq ukrainaliklar Yevropaga kirib kelgan.

Rossiyaning Ukrainaga qurolli bostirib kirishi boshlanganidan beri avgust oyining oxirigacha Germaniyaga deyarli bir million ukrainalik qochqin keldi. Federal statistika boshqarmasi ma’lumotlariga ko‘ra, ukrainalik qochqinlarning aksariyati urush boshlanganidan keyingi dastlabki oylarda kelgan. Shunday qilib, mart oyida Germaniya hukumati 431 ming, aprelda esa 198 ming holatni qayd etgan. O‘shandan beri Germaniyaga kelayotgan ukrainaliklar soni kamayib bormoqda. Iyul oyida Germaniyaga 58 ming, avgust oyida esa 70 ming ukrainalik kelgan. Statistik ma’lumotlarga ko‘ra, joriy yilning avgust oyida Ukraina Germaniyaga qochqinlar kelgan asosiy davlat bo‘lib qolgan. Shu bilan birga, statistika organlari Ukrainaga qaytib ketishning 78 mingga yaqin holatini qayd etgan.