Hozirda Rossiya va AQSh o‘rtasida «muzokaralar uchun platforma yo‘q», dedi Rossiya prezidenti. Uning so‘zlariga ko‘ra, urushda har qanday qo‘shinning Ukraina tomonida ishtirok etishi falokatga olib kelishi mumkin.
Rossiya prezidenti Vladimir Putin AQSh prezidenti Jozef Bayden bilan to‘g‘ridan to‘g‘ri muzokaralar o‘tkazishga hojat yo‘q, deb hisoblamoqda. Bu haqda u 14 oktyabr, juma kuni Ostona shahrida Qozog‘istonga safari yakunlari bo‘yicha o‘tkazilgan matbuot anjumanida ma’lum qildi. «Hozircha hech qanday muzokaralar uchun platforma yo‘q», — dedi Putin.
U, shuningdek, Indoneziyadagi G20 sammitiga safari haqidagi qaror hali yakuniy qabul qilinmaganini aytdi. Putinning so‘zlariga ko‘ra, u G20 a’zolarining ba’zi yetakchilari bilan doimiy aloqada bo‘lib turibdi, «AQSh prezidenti bilan esa bunday masalalar muhokama qilinmagan». G20 sammiti noyabr oyi o‘rtalarida Indoneziyaning Bali orolida bo‘lib o‘tadi.
Ukrainadagi urushga to‘xtalar ekan, Putin Ukrainaga har qanday qo‘shinning, jumladan, NATO kuchlarining kiritilishi va Rossiya armiyasi bilan to‘g‘ridan to‘g‘ri to‘qnashuv «xavfli qadam va global falokatga olib kelishi mumkinligini» aytdi. «Umid qilamanki, bu haqda gapirayotganlar bunday xavfli qadamlar qo‘ymaslik uchun yetarlicha aqlga ega bo‘ladilar», dedi u Ukraina urushda mag‘lubiyatga uchragan taqdirda NATO qo‘shinlari haqidagi savolga javob berib. «Bu huquqiy texnika masalasi. Ukrainaning mag‘lubiyati nima? Buni har kim turlicha tushunishi mumkin. 2014 yilda Qrimning Rossiya sub’yektiga aylangani mag‘lubiyatmi? Bu nima ekanligini tushunishingiz kerak», — dedi Putin.
Rossiyadagi safarbarlik haqida gapirar ekan, Putin uni noyabrgacha yakunlashga va’da berdi. «O‘ylaymanki, taxminan ikki hafta ichida barcha safarbarlik tadbirlari yakunlanadi», dedi u. Rossiya prezidentining so‘zlariga ko‘ra, hozirda 300 000 kishidan 222 000 kishi tuzilma qo‘shinlariga safarbar etilgan. Shuningdek, u hozircha qo‘shimcha safarbarlik bo‘lmasligini bildirdi: «Qo‘shimcha hech narsa rejalashtirilmagan. Mudofaa vazirligidan bu borada hech qanday taklif tushmagan, men ham yaqin vaqt ichida hech qanday zarurat ko‘rmayapman». Putinning so‘zlariga ko‘ra, safarbarlik paytidagi «anglashilmovchilik» o‘nlab yillar davomida yangilanmagan eski hisob-kitob shakllari bilan bog‘liq. Uning qo‘shimcha qilishicha, axborot bazasi yangilanmoqda.
21 sentabr kuni «qisman safarbarlik»ni e’lon qilar ekan, Putin «talab bo‘lgan harbiy mutaxassisliklarga ega ayrim toifadagi fuqarolar»ni harbiy xizmatga chaqirish haqida gapirdi. Putinning farmonida safarbarlik hajmi ko‘rsatilmagan, keyinroq Mudofaa vazirligi 300 ming kishini chaqirish niyatida ekanligini ma’lum qilgan.
Aslida, safarbarlik ommaviy bo‘lib chiqdi va ko‘plab qonunbuzarliklar bilan amalga oshirilmoqda - odamlar harbiy ixtisosligidan qat’i nazar chaqirilmoqda, harbiy xizmatni o‘tamaganlar, surunkali kasalliklarga chalinganlar ham bor. Safarbarlik boshlanganidan beri uch hafta ichida yig‘in punktlarida 20 ga yaqin odam halok bo‘ldi. Ijtimoiy tarmoqlarda tarqalgan xabarlarga ko‘ra, safarbar qilinganlarning bir qismi harbiy tayyorgarlikdan o‘tmagan yoki u juda kam bo‘lgan holda frontga jo‘natilgan. Rossiya hukumati Ukrainada safarbar qilingan besh kishi halok bo‘lganini allaqachon tan olgan.
