Buxoroda xonadonda gaz portlashi oqibatida 8 yoshli bola vafot etdi

Holatga gaz plitasidan tabiiy gaz sizib chiqqan xonada elektr energiyasi yoqilganligi sabab bo‘lgan.

Ijtimoiy tarmoqlarda Buxoro viloyatida gaz portlashi oqibatida yosh bola vafot etgani haqida xabar tarqaldi. Buxoro viloyati IIB holat yuzasidan rasmiy ma’lumot berdi.

Ma’lum qilinishicha, 2022 yilning 16 oktabr kuni soat 20.30larda Qorako‘l tumanidagi Quyi xo‘jalar qishlog‘ida yashovchi N.R. ismli fuqaroning uyida yong‘in sodir bo‘lgan.

“Surishtiruv ishlari davomida ushbu xonadon oshxonasidagi gaz plitasidan tabiiy gaz sizib chiqishi hamda qarovsiz qoldirilgan 8 va 4 yoshli ikki nafar voyaga yetmagan farzandlar tomonidan elektr chirog‘ining yoqilishi natijasida chaqnash sodir bo‘lganligi aniqlangan. Oqibatda voyaga yetmagan aka-singil J. va Sh.S. tan jarohati olib, tuman tibbiyot birlashmasiga yotqizilgan. Olib borilgan tibbiy muolajalarga qaramay J.S. shifoxonada vafot etgan”, — deyiladi IIB ma’lumotida.

Holat yuzasidan tegishli ekspertizalar tayinlangan va Qorako‘l tuman IIB Tergov guruhi tomonidan tergovga qadar tekshiruv harakatlari olib borilmoqda.

Oldinroq Surxondaryo viloyatidagi xonadonlardan birida ham gaz portlagan va xonadon egasi va uning farzandi turli darajada kuyish tan jarohatini olgandi.

#gaz portlashi #Qorako‘l tumani