Germaniya kansleri Putin unga tahdid qilgani haqidagi xabarni rad etdi

Rossiya prezidenti bilan muzokaralar chog‘ida Putin tomonidan tahdid qilingani haqidagi xabarlar «yolg‘on», dedi Olaf Shols Welt am Sonntag haftaligiga bergan intervyusida.

Germaniya kansleri Olaf Shols Rossiya prezidenti Vladimir Putin u bilan ikki tomonlama suhbatlarda go‘yoki Ukrainadagi urushni kengaytirish bilan tahdid qilgani haqidagi xabarlarni rad etdi. Bu haqda Germaniya vazirlar mahkamasi rahbari Welt am Sonntag haftaligiga bergan intervyusida ma’lum qildi, undan parchalarni 22 oktyabr, shanba kuni nashr o‘z veb-saytiga joylashtirdi. 

«Ushbu muzokaralar chog‘ida tahdidlar bo‘lgani haqidagi taxminlar, men o‘qigan xabarlar yolg‘ondir», dedi kansler. Bundan tashqari, Shols Germaniyaning Rossiyaga energetika qaramligi xavfini allaqachon anglab etganini aytdi. 

Putinning energiya manbalaridan «qurol sifatida» foydalanishi haqida gapirar ekan, Germaniya hukumati rahbari shunday dedi: «Menga erta bosqichdayoq ishlar shu darajaga yetib kelishi mumkinligi aniq edi». Kansler o‘shanda shunday xulosaga kelganini bildirdi: «Rossiyadan keladigan arzon gazdan foydalanishimiz mumkin, lekin o‘zimizni unga qaram qilmasligimiz kerak, boshqa ta’minot manbalarini rivojlantirishimiz lozim». 

Hamburg meri sifatida u Germaniyaning shimoliy qirg‘og‘ida suyultirilgan tabiiy gaz (STG) terminallarini qurishni yoqlagan, deb ma’lum qildi Shols. «Afsuski, hech qanday natija bo‘lmadi», dedi kansler. Siyosatchining so‘zlariga ko‘ra, Germaniya moliya vaziri bo‘lgan davrda u bu maqsadiga erishishda davom etgan. «Oldingi hukumat Brunsbyuttel, Shtade i Vilgelmsxafenda STG terminallarini qurishni rejalashtirishni iqtisodiy jihatdan foydaliroq qiladigan qonun qabul qildi», dedi Shols. Bugun Germaniya bundan foyda ko‘rmoqda, deb hisoblaydi u. 

Shu bilan birga, kanslerning so‘zlariga ko‘ra, o‘sha bosqichda loyihalar uchun moliyaviy homiylarni topishning iloji bo‘lmagan, shuning uchun investitsiyalar amalga oshirilmagan. 

Biroq, Olaf Shols avvalgi hukumat - Angela Merkel tarkibida bo‘lganida energiya ta’minotini diversifikatsiya qilish bo‘yicha o‘z pozitsiyasida yolg‘iz bo‘lganmi, degan savolga javob berishni istamadi. «Kansler lavozimiga saylanganimdan ko‘p o‘tmay, men kanslerlikdagi mas’ul tuzilmalardan Rossiyadan kelayotgan gaz to‘xtab qolsa, nima qilishimizni so‘radim. Afsuski, bu borada hech qanday rejalar yo‘q edi», - dedi Shols. 

Avvalroq, 20 oktyabr kuni WDR va NDR jamoat teleradiokompaniyalari jurnalistlari kansler o‘z hukumatining olti vazirlari fikriga zid ravishda Hamburg porti aksiyalarining bir qismini xitoyliklarga sotishga ruxsat berish niyatida ekanini ma’lum qilgan edi. COSCO davlat kompaniyasi bo‘lib, dengiz yuk va konteyner tashish bo‘yicha dunyoning yetakchilaridan biri. Bunga javoban «Ittifoq-90/Yashillar» va liberal Erkin demokratik partiya a’zolari Rossiya gazi bilan bog‘liq tajribani eslatdi.

Germaniyaning adliya vaziri, liberal Marko Bushman so‘zlariga ko‘ra, «Germaniyadagi hech qanday muhim infratuzilmaning Xitoy hukumati nazorati ostiga tushishiga yo‘l qo‘yib bo‘lmaydi. Bu mustaqillik masalasidir». Bushman Xitoy bilan ham Rossiya bo‘yicha bir xil xatoni takrorlamaslikka chaqirdi.