15:06 / 30.10.2022
25030
«Насаф» 5 йилдан буён мағлуб эта олмаётган рақиб. «Навбаҳор» Бухорода 24 йиллик тарихни янгилайдими?

Бугун, 30 октябрь куни Ўзбекистон кубоги финали доирасида «Навбаҳор» - «Насаф» баҳси бўлиб ўтади. Бухородаги тўқнашувда кубок билан бирга Осиё Чемпионлар лигаси йўлланмаси ҳам тикилган. Кўҳна шаҳардаги финал мухлисларда катта қизиқиш уйғотган.

24 йиллик тарих янгиланадими?

«Насаф» ва «Навбаҳор» Суперлига чемпионлиги учун курашиш билан бирга кубокнинг янги эгасини ҳам аниқлаб беришади. «Навбаҳор» 1998 йилдан кейин илк марта финалга чиқди ва 24 йил ўтиб, Ўзбекистон кубогини қўлга киритиш имкониятига эга. «Насаф» эса кубокнинг амалдаги соҳиби саналади. Воҳаликлар ўтган йил Самарқандда ўтган кубок финалида «Пахтакор»ни мағлуб этишганди. Бу йил уларни совринни кетма-кет иккинчи марта Қаршига олиб кетишлари мумкин.

Кимнинг таркиби қимматроқ?

Transfermarket порталига кўра, футболчиларнинг умумий қиймати бўйича Самвел Бабаян қўл остидаги таркиб Рўзиқул Бердиев мураббийлигидаги жамоадан бироз қимматроқ.

«Навбаҳор» таркибининг трансфер баҳоси: 8,88 млн евро

Энг қиммат 5 футболчиси:

  •  Йован Жокич – 750 минг евро
  • Рустам Ашурматов – 750 минг евро
  • Нурилло Тўхтасинов – 750 минг евро
  • Жамшид Искандеров – 600 минг евро
  • Жасур Яхшибоев – 550 минг евро

«Насаф» таркибининг трансфер баҳоси: 8,81 млн евро

Энг қиммат 5 футболчиси:

  1. Ойбек Бозоров – 800 минг евро
  2. Ҳусайн Норчаев – 800 минг евро
  3. Ҳусниддин Алиқулов – 700 минг евро
  4. Абдувоҳид Неъматов – 650 минг евро
  5. Умар Эшмуродов – 600 минг евро

Сўнгги 5 йил ичидаги ўзаро ўйинлар: «Насаф» «Навбаҳор»ни мағлуб эта олмаяпти

Ўзаро ўйинлар статистикасига кўра, Наманган клуби сўнгги йилларда Қарши жамоасига мағлуб бўлаётгани йўқ.

  • 2022 йил: Насаф – Навбаҳор – 0:1
  • 2022 йил: Навбаҳор – Насаф – 0:0
  • 2021 йил: Насаф – Навбаҳор – 0:1
  • 2021 йил: Навбаҳор – Насаф – 0:0
  • 2020 йил: Навбаҳор – Насаф – 0:0
  • 2020 йил: Насаф – Навбаҳор – 2:2
  • 2019 йил: Навбаҳор – Насаф – 1:1
  • 2019 йил: Насаф – Навбаҳор – 0:1
  • 2018 йил: Навбаҳор – Насаф – 0:0
  • 2018 йил: Насаф – Навбаҳор – 1:1
  • 2017 йил: Навбаҳор – Насаф – 1:0
  • 2017 йил: Насаф – Навбаҳор – 4:0

Ўйин олди ким қандай фикрда?

Самвел Бабаян: «Финалдаги ғолиблик ОЧЛга йўлланма беради. Бу – мавсумдаги мақсадимиз»

- Фаолиятимдаги 11-финал бу. Аммо менда ҳаяжон йўқ, дея олмайман. Биз учун финал жуда муҳим. Қолаверса, бу ердаги ғалаба орқали мавсумдаги асосий мақсадимиз – Чемпионлар лигасига тўғридан-тўғри йўлланма олишимиз мумкин. Шундай экан, финалда ғолиб бўлиш биз учун ҳам жуда муҳим. Ҳа, Суперлигада етакчиларни мағлуб этдик, аммо ўртамиёналар билан баҳсларда кўп очко йўқотдик. Олдиндаги учта ўйинда кўпроқ очко жамғариб, чемпионлик учун курашамиз. Кўпчиликнинг хабари бор, раҳбариятимиз билан мақсадларимиз бир йиллик эмас, узоқ йиллик лойиҳа. Шундай экан, ҳар қандай ҳолатда ҳам бизда мақсадлар ўзгармайди. Бухородаги финалда мухлисларимизни хурсанд этиш ва Наманганга кубок билан қайтишга уринамиз. Ўйин шиддатли ўтиши аниқ, - дейди Самвел Бабаян матбуот анжуманида.

Рўзиқул Бердиев: «Суперлига чемпионлиги ёки кубок? Иккисини ҳам танлайман, чунки совринларга яқинмиз»

- Финал ажойиб муҳитда бўлади. Бухородаги стадион билан бугун танишдик, майдон ҳам яхши тайёрланган. Финалга иккита етакчи ва кучли жамоа етиб келди. Улар эртанги баҳсда кубокни ютишга интилади. Финалга яхши тайёргарлик кўрдик, деб ўйлайман. Жамоамиз баҳсга шай. Фикримча, финалларда ўйнаш тажрибаси бизда бор. Бу эртага ҳам қўл келишига умид қиламан. Ҳусайн Норчаевнинг йўқлиги биз учун катта йўқотиш. Охирги ўйинларда у асосан голлари билан эмас, майдондаги меҳнати билан катта ёрдами тегаётганди. Афсуски, финалда Ҳусайн қатнаша олмайди. Йўқотишга қарамай, ўйинга тактик жиҳатдан ҳам, таркиб жиҳатдан ҳам шаймиз. Натижа учун боримизни берамиз.

Суперлига чемпионлиги ёки кубок? Танлаш имконияти бўлганда бирини эмас, иккисини ҳам танлаган бўлардим. Чунки иккиласига ҳам жуда яқин турибмиз ва бу совринлар учун курашамиз. Иккита кубокни ҳам ютишни хоҳлаяпмиз. Биз бундай ўйинларга тайёрмиз, - дейди қаршиликлар бош мураббийи.

Анонс. 30 октябрь (якшанба)

Ўзбекистон кубоги. Финал

«Навбаҳор» - «Насаф»

Бош ҳакам: Вадим Агишев (Тошкент)

«Бухоро» спорт мажмуаси. 22 700 томошабин сиғимли.

ТВ-трансляция: Спорт.

Ўйин бошланиш вақти: 17:00.

Усмон Ибодов

Top