Bayden AQSh «Eronni ozod etmoqchiligi»ni aytdi, Raisiy javob qaytardi

AQSh prezidenti Jo Bayden Kongress uchun oraliq saylovlar munosabati bilan Kaliforniyada qilgan chiqishida AQSh «Eronni ozod qilmoqchiligi» haqida gapirdi. Bu haqda Bloomberg xabar bermoqda.

Baydenning nutqi Iroq va Afg‘onistonda xizmat qilgan amerikalik faxriylarga tibbiy yordam ko‘rsatish masalasiga bag‘ishlangandi. Shu vaqtda u pauza oldi va dedi: «Xavotirlanmang, biz Eronni ozod etmoqchimiz».

Shundan so‘ng u tezda qo‘shimcha qilgan: «Ular tez orada o‘zlarini o‘zlari ozod etishadi». AQSh prezidenti aynan nimani nazarda tutganiga aniqlik kiritmagan.

Amerika rahbarining shu iqtibosi Reuters agentligi tomonidan ham keltirilgan, xabarda prezident chiqish qilgan joyga Erondagi namoyishlarni qo‘llab-quvvatlovchi bannerlar ko‘targan o‘nlab kishilar kelgani aytilgan.

Ko‘p o‘tmay Eron prezidenti Ibrohim Raisiy Baydenning so‘zlariga munosabat bildirib, Eron 1979 yilgi islom inqilobidan keyin ozod etilgani haqida aytib chiqdi.

«Men [AQSh prezidenti Jo] Baydenga aytamanki, Eron 43 yil muqaddam ozod etilgan», — deya uning telemurojaat vaqtidagi so‘zlarini keltiradi Reuters.

Erondagi namoyishlar

Erondagi namoyishlar sentabr oyi o‘rtalarida, 22 yoshli qiz Mahsi Aminiyning vafotidan keyin boshlangandi. Ma’naviyat politsiyasi uni Tehrondagi metrodan ukasi bilan chiqish vaqtida hijobni to‘g‘ri kiymagani uchun qo‘lga olgandi.

Keyinroq Aminiyning ukasi IranWire nashriga politsiyachilar u bilan «qayta tarbiyalash» mashg‘ulotlari o‘tkazishni va’da qilishgandi. Politsiya uchastkasidan qizni tez yordam mashinasi orqali shifoxonaga olib ketishadi. Keyinroq shifokorlar uning yuragi xuruj qilgani va insultga uchraganini aytishadi, bir necha kun o‘tib u vafot etadi.

Eron politsiyasi baxtsiz hodisa ro‘y berganini ta’kidlab keladi. Idora Aminiy hushini yo‘qotayotgani aks etgan videoni namoyish etgan. Ammo qizning qarindoshlari politsiyani qotillik sodir etishda gumonlagan.

Eron hukumati namoyishlar «dushmanning islomiy rejimni zaiflashtirishga qaratilgan strategiyasi»ning bir qismi ekani va mamlakat armiyasi «dushmanga qarshi turishi», shuningdek namoyishlar fonida xavfsizlikni ta’minlashini ma’lum qilgan.

Eron oliy rahnamosi oyatulloh Ali Xominaiy namoyishlar «oddiy eronliklar» tomonidan o‘tkazilmayotgani, balki oldindan puxta rejalashtirilganini aytgan, shuningdek AQSh va Isroilni tartibsizliklarni uyushtirishda ayblagan.

Raisiy ham Tehron namoyishchilar bilan «qat’iy kurashishi»ni aytgan.

Mitinglar chog‘ida to‘qqiz nafar xorijlik, jumladan Germaniya, Polsha, Italiya, Fransiya, Niderlandiya, Shvetsiya va boshqa mamlakatlar fuqarolari qo‘lga olingan. Bundan tashqari, Eronda faoliyati taqiqlangan guruh a’zolari bo‘lgan 250 dan ortiq kishi terror va tartibsizliklar qo‘zg‘atishda gumonlanib hibsga olingan.