Berlinda «O‘zbekiston – Aleksandr Makedonskiydan Kushon imperiyasigacha» ko‘rgazmasi tashkil etiladi

Berlin qadimiy tarix muzeyi direktori, professor Matias Vemxoff Germaniya federal tashqi ishlar vaziri Annalena Berbokning O‘zbekistonga amalga oshirgan tashrifiga o‘z munosabatini bildirdi, deb xabar bermoqda «Dunyo».

Foto: Dunyo

31 oktabr – 2 noyabr kunlari Germaniya federal tashqi ishlar vaziri O‘zbekistonga tashrif buyurdi. Oliy darajadagi ko‘plab uchrashuv va muzokaralar, O‘zbekiston-Germaniya va O‘zbekiston-Yevropa hamkorligiga oid dolzarb masalalar muhokama qilingani hozirdanoq ijobiy samaralar bermoqda.

Matias Vemxoffga ko‘ra, Germaniya aholisi va yevropaliklarni O‘zbekiston madaniyati va tarixi bilan yaqindan tanishtirish maqsadida yaqin kunlarda Berlinda «O‘zbekiston – Aleksandr Makedonskiydan Kushon imperiyasigacha» nomli katta ko‘rgazma tashkil etish rejalashtirilgan.

Ko‘rgazma Jyeyms Saymon galereyasida 2023 yil aprel – oktabr oylarida bo‘lib o‘tadi va unda O‘zbekistondagi turli muzeylardan olib kelinadigan 270 ta arxeologik eksponat taqdim etiladi.