«Sberbank» rahbari: Firmalarning Rossiyadan chiqib ketishi iqtisodiyotga yo‘qotishlar bilan tahdid qilyapti

Rossiyaning Ukrainaga harbiy bostirib kirishi munosabati bilan xorijiy kompaniyalarning Rossiya bozoridan ommaviy ravishda chiqib ketishi uzoq muddatli istiqbolda mamlakat iqtisodiyotiga zarar yetkazadi, dedi payshanba, 10 noyabr kuni Moskvadagi «Finopolis» forumida «Sberbank» boshqaruvi raisi German Gref. «Men xorijlik sotuvchilarning bozordan chiqib ketishiga yaxshi baho bera olmayman. Hech bir Rossiya kompaniyasi avvalgi raqobat darajasini saqlab qola olmaydi», - deya Gref so‘zlarini keltirgan RBK.

«Ayrim aktivlarni bir martalik va nisbatan arzon olish - kimgadir bir martalik foyda bo‘ladi, ammo iqtisodiyot uzoq muddatda yutqazadi, chunki raqobat zichligi pasayadi», deb tushuntirdi «Sberbank» boshqaruv raisi. «Raqobat bo‘lmagan joyda innovatsiya ham bo‘lmaydi», — deya qo‘shimcha qildi u. 

Shu bilan birga, VTB boshqaruvi raisi Andrey Kostinning aytishicha, Rossiyadan xorijiy kompaniyalarning chiqib ketishi tejash imkonini beradi. «Ehtimol, eng yirik kompaniyalarning ketishida yaxshi narsa yo‘qdir, lekin, aytmoqchi, bu bizga nafaqat siyosiy yoki biznes himoyasini taqdim etadi, balki xarajatlarni tejashni ham beradi», dedi u. VTB rahbarining so‘zlariga ko‘ra, uning tuzilmalari uch yil ichida 500 milliard rublni tejashga qodir bo‘ladi, chunki ular qisman xorijiy IT mahsulotlarini almashtirdi.

Yyel menejment maktabi ma’lumotlariga ko‘ra, noyabr oyi boshiga kelib, iqtisodiyotning ko‘plab sohalaridagi mingdan ortiq xorijiy kompaniyalar Rossiyani tark etgan, mamlakatdagi faoliyatini qisqartirgan yoki to‘xtatgan. O‘z navbatida, bir qator rus firmalari tashqi bozorlarni tark etishga yoki ulardagi mavjudligini cheklashga majbur bo‘ldi. Shunday qilib, aprel oyida VTB Frankfurt-Mayn shahrida joylashgan VTB Bank Europe SE’ning Yevropa shu’ba korxonasi ustidan nazoratni yo‘qotdi. Mart oyida «Sberbank» Yevropa bozoridan chiqishini e’lon qildi.