Hamkasblari kartasidagi pulni o‘zlashtirgan professional futbolchiga nisbatan jinoyat ishi qo‘zg‘atildi

Professional futbol klubi futbolchilari, 1993 yilda Jizzax viloyatida tug‘ilgan Q.B. va 1994 yilda Surxondaryo viloyatida tug‘ilgan A.S. ariza bilan murojaat qilib, noma’lum shaxs bank kartalaridagi umumiy 18 341 250 so‘m pullarini yechib olinganini bildirgan.

IIV Kiberxavfsizlik markazi xabariga ko‘ra, tezkor-qidiruv tadbirlari natijasida pullarni o‘zlashtirgan shaxs futbol klubi a’zosi, Farg‘ona viloyati O‘zbekiston tumanida yashovchi M.M. ekani aniqlangan.

M.M. ushbu jinoyatni futbol klubi jamoasi mashg‘ulotlar o‘tkazgan vaqtda futbolchilar buyumlari qoldirilganidan foydalanib telefon qurilmalaridan bank kartasi ulangan sim-kartalarni o‘z qurilmasiga o‘tkazib, SMS-xabarnomalarni qo‘lga kiritish yo‘li bilan amalga oshirgani ma’lum bo‘ldi.

M.M.ga nisbatan Jinoyat kodeksi 169-moddasi 3-qismi bilan jinoyat ishi qo‘zg‘atilib, tergov harakatlari olib borilmoqda.