Toshkent tibbiyot akademiyasida pediatriya sohasidagi muammolarga bag‘ishlangan Xalqaro ilmiy-amaliy konferensiya bo‘lib o‘tdi

Bugun, 15 dekabr kuni Toshkent tibbiyot akademiyasida pediatriya sohasidagi muammo va takliflarni o‘rganish maqsadida Xalqaro ilmiy-amaliy konferensiya tashkil etildi. Unda Rossiya, Qozog‘iston, Litva, Hindiston hamda respublikamizdagi tibbiyot oliygohlaridan  bolalar kasalliklari bo‘yicha yetuk mutaxassislar ishtirok etdi.

Ta’kidlash joizki, Toshkent Tibbiyot Akademiyasining yosh mutaxassislari, magistr va klinik ordinatorlari, ilmiy xodim va tibbiyot oliygohlarining yuqori kurs talabalari uchun bu konferensiyaning ahamiyati katta.  Yig‘ilishda bolalar kasalliklarining dolzarb muammolariga doir turli qarashlar, bolalar shifokorligi yo‘nalishida mutaxassislar yetishmasligi, zamonaviy diagnostika bo‘yicha kadrlarga ehtiyoj masalasi muhokama qilindi.

Ma’lumotlarga ko‘ra, ayni kunda respublika bo‘yicha jami pediatriya muassasalari soni 117ta bo‘lib, ajratilgan pediatr shtati 4326ta, hozirgi kunda band bo‘lgan shtat 3494 stavkaga to‘g‘ri kelmoqda. Unda 2078ta vrach pediatr ishlamoqda, pediatriya sohasi kadrlar tanqisligi yuqoriligi, pediatriya ixtisosligi bo‘yicha kadrlar tayyorlash zarurligini ko‘rsatadi. Ba’zi bir hududlarda pediatr shifokorlar yetishmasligi kuzatiladi. 

Anjumanda Toshkent tibbiyot akademiyasining oldida turgan eng asosiy vazifalardan biri yangi ochilgan pediatriya fakultetining imkoniyatlarini oshirish, pediatrlar tayyorlash uchun professor-o‘qituvchilar ilmiy salohiyatini oshirish, moddiy –texnik bazasini yaxshilash ustida ish olib borishga kelishib olindi.

Toshkent tibbiyot akademiyasi matbuot xizmati.