Rossiyada gripp bilan kasallanish yil davomida 11 barobarga oshdi

Rossiyada gripp bilan kasallanish yil davomida keskin oshdi: 2021 yilga nisbatan kasallanganlar soni 11 martaga ko‘paydi, deb xabar berdi RBK agentligi 15 dekabr, payshanba kuni Rospotrebnadzorga tayanib. Idoradan ta’kidlanishicha, joriy yilning yanvar-fevral oylarida gripp bilan kasallanish har 100 ming aholiga 7,87 tani tashkil etgan. Shu bilan birga, o‘tgan yilning shu davrida bu ko‘rsatkich har 100 ming aholiga 0,71 darajasida edi.

Rospotrebnadzor ma’lumotlariga ko‘ra, dekabrgacha 74 million rossiyalik grippga qarshi emlangan bo‘lsa, o‘tgan yilning dekabrida 85,9 million, 2019 yil dekabrida esa 73,9 million kishi emlangandi. Ushbu haftada idora so‘nggi yetti kun ichida Rossiyada O‘RVI va gripp bilan kasallanish 35,4 foizga oshgani haqida xabar berdi. Kasallanganlarning eng ko‘pi Tyumen, Yoqutiston, Astraxan, Komi, Xanti-Mansiysk, Buryatiya, shuningdek, Kostroma va Vologdada qayd etildi.

Rossiyaning 82 ta hududida «cho‘chqa grippi» aniqlangan. Bundan tashqari, Rossiyada 13 dekabr holatiga ko‘ra, o‘tgan haftaga nisbatan 11 foizga ko‘p – 48 mingta koronavirus infeksiyasi holati qayd etilgan.

Shu bilan birga, Germaniyada Robert Kox instituti (RKI) ham o‘tgan hafta gripp bilan kasallanishning keskin o‘sishini qayd etdi - kasallikning 44 300 ga yaqin holatlari laboratoriya tomonidan tasdiqlangan, bu bir hafta oldingiga nisbatan 58 foizga ko‘p. Bemorlarning deyarli to‘qqiz foizi kasalxonaga yotqizilishi kerak bo‘lgan.

RKI tomonidan 14 dekabr kuni e’lon qilingan xulosaga ko‘ra, oktyabr oyi boshidan buyon Germaniyada 227 ta gripp tarqalishi qayd etilgan bo‘lib, bunda beshtasida kasallanish holatlari qayd etilgan, ulardan 81 tasi maktablarda, 79 tasi bolalar bog‘chalarida kuzatildi. 64 kishi gripp infeksiyasi oqibatlaridan vafot etdi.