Alisher Usmonov nemis matbuotida raddiya e’lon qilinishiga erishdi

Germaniyadagi yetakchi OAV o‘zbekistonlik tadbirkor Alisher Usmonov haqidagi maqolalarini yana bir bor tuzatishga majbur bo‘ldi, deb yozadi Berliner Zeitung.

O‘tgan yilning sentabr oyida Germaniyada Bavariyadagi bir nechta uyda keng ko‘lamli tintuvlar o‘tkazilgan edi. Nemis matbuoti ularni 2022 yil fevralidan beri Yevropa Ittifoqi sanksiyalari ostida qolayotgan Alisher Usmonov bilan bog‘lagan. Xususan, Germaniyaning eng yirik DPA axborot agentligi tintuv qilingan «Tegernzeye ko‘lidagi uy»ning egasi Alisher Usmonov ekanligini ta’kidladi. Ma’lum bo‘lishicha, Usmonov Germaniyada pul yuvish, soliq to‘lashdan bo‘yin tovlash va Yevropa Ittifoqi sanksiyalarini buzishda ayblanmoqda. Biroq, Berliner Zeitung nashrining yozishicha, nemis rasmiylarining bu da’volari bo‘yicha jamoatchilikka hali hech qanday dalil taqdim etilmagan. Tadbirkorning o‘zi Germaniyadagi ko‘chmas mulk egasi emasligini ta’kidlab, barcha ayblovlarni darhol rad etdi. Aslida, u obektlardan ijara asosida foydalangan.

O‘tgan hafta Alisher Usmonovning advokatlari DPA va uning xabarini qayta nashr etgan boshqa OAVni o‘z ma’lumotiga tuzatish kiritishga majbur qilishga muvaffaq bo‘lganligi ma’lum bo‘ldi. DPA va undan keyin bir necha o‘nlab nemis nashrlari o‘zlarining sentabr materiallariga o‘zgartirishlar kiritdi. Usmonov vakillaridan sudgacha da’volar olgandan so‘ng Usmonov haqidagi maqolalari olib tashlanganini Germaniyaning eng yirik internet-resurslaridan biri web.de va Funke mediaguruhiga tegishli Westfalenpost gazetasi xabar qilgan.

Biroq, Usmonovning advokatlari nafaqat nemis matbuotini mag‘lub etishga muvaffaq bo‘lishdi: nuz.uz ma’lumotlariga ko‘ra, ular Myunxen prokuraturasini o‘z veb-saytidan Usmonovga nisbatan ishonchsiz ayblovlar tarqatilgan press-relizni olib tashlashga ham majburlagan.