Zarkentda yangi yo‘l o‘tkazgich qurilishida ishlayotgan avtokran quladi, bir kishi vafot etdi 

Qayd etilishicha, avtokran temir-beton balkaning og‘irligi 30,6 tonna bo‘lgan ikkita kran yordamida montaj qilish vaqtida qulagan.

Avtokran bilan yuz bergan baxtsiz hodisa yukni bir nechta kranlar bilan ko‘tarish asosida amalga oshirilmagani sababli ro‘y bergani aytiladi.

Avtokranning og‘ib ketishi oqibatida avtokran mashinisti tan jarohatlari olgani sababli «Ko‘prikqurilish tresti» UK qarashli «13-Ko‘prikqurilish otryadi» xodimlari tomonidan Parkent tumani shifoxonasiga yotqizilgan. Og‘ir jarohatlar olgani sababli avtokran mashinisti shifoxonada vafot etgan.

Ta’kidlanishicha, «Ko‘prikqurilish tresti» UKga qarashli «13-Ko‘prikqurilish otryadi» «QYL-YO‘L KO‘PRIK QURILISH TAʼMIR» MChJ bilan shartnoma imzolagan. Ushbu hujjatda buyurtmachi tomonidan xizmat ko‘rsatuvchi xodimlarini kunlik tibbiyot ko‘rigidan o‘tkazish va mehnat muhofazasi tadbirlarini o‘tkazish lozim bo‘lgan band alohida ko‘rsatib o‘tilgan.

«QYL-YO‘L KO‘PRIK QURILISH TAʼMIR» MChJ tomonidan shartnoma bandlariga rioya qilmagani, ya’ni muntazam ravishda xavfsizlik choralarini ko‘rmagani sababli ushbu baxtsiz hodisa ro‘y bergan», deyiladi ma’lumotda.

Ma’lum qilinishicha, ikkita kran bilan bir vaqtning o‘zida yukni ko‘tarish va ko‘chirishga faqat quyidagi shartlar bajarilgan taqdirdagina ruxsat beriladi:

• ikkala kranning mutlaq xizmat ko‘rsatish qobiliyati va tormozlarning bir vaqtning o‘zida ishlashi;
• kranlar mexanizmlari va har bir kranga tushadigan yuklarning tezligi, yuk ko‘tarish qobiliyati mutanosibligi;
• Agar yuk travers yordamida ko‘tarilsa, u holda uning tashish qobiliyati ko‘tarilayotgan yukning massasiga mos kelishi kerak.

Kranlar teng ko‘tarish qobiliyatiga ega bo‘lganda, travers teng qulochli bo‘lishi kerak, ya’ni yuk ilgagi uning o‘rtasida bo‘lishi kerak.

Rasmiy xabarga ko‘ra, Toshkent viloyati mehnat inspeksiyasi mutaxassislari tomonidan sodir bo‘lgan baxtsiz hodisa yuzasidan maxsus tekshirish o‘tkaziladi va ular xulosalari huquq-tartibot organlariga taqdim etiladi.