Investitsiyalar vazirligiga «O‘zcharmsanoat» va «O‘zbekipaksanoati»ning ayrim vakolatlari o‘tkaziladi

Vazirlar Mahkamasining «O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida»gi qarori loyihasi e’lon qilindi.

O‘zbekiston Hukumatining ayrim qarorlariga quyidagilarni nazarda tutuvchi o‘zgartirish va qo‘shimchalar kiritiladi:

• Investitsiyalar, sanoat va savdo vazirligi tomonidan eksport qilinadigan xomashyo mahsulotlarining hajmlari O‘zbekiston prezidenti va Hukumat qarorlari bilan belgilangan hajmlarga muvofiqligini monitoring qilish;
• Investitsiyalar, sanoat va savdo vazirligiga «O‘zcharmsanoat» uyushmasining O‘zbekiston bojxona chegarasi orqali charm va momiq mo‘yna xomashyosini olib chiqishni monitoring qilish vakolatini o‘tkazish;
• Investitsiyalar, sanoat va savdo vazirligiga «O‘zbekipaksanoati» uyushmasining O‘zbekiston bojxona chegarasi orqali charm va momiq mo‘yna xomashyosini olib chiqishni monitoring qilish vakolatini o‘tkazish.

Investitsiyalar, sanoat va savdo vazirligi:

• Iqtisodiyot va moliya vazirligi huzuridagi Bojxona qo‘mitasi, manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni ushbu qarorga muvofiqlashtiradi;
• «O‘zcharmsanoat» va «O‘zbekipaksanoat» uyushmalari bilan birgalikda xom ipak, teri va qorako‘l teri mahsulotlari eksporti hajmlarini O‘zbekiston prezidenti va Hukumati qarorlari bilan belgilangan hajmlarga muvofiqligi yuzasidan ruxsatnoma berishda shaffof elektron tizimini joriy etadi hamda 2023 yil 1 apreldan boshlab to‘liq elektron shaklda amalga oshirilishini ta’minlaydi.