Konstitutsiyaga 27 ta yangi modda qo‘shiladi

O‘zbekiston konstitutsiyasidagi moddalar soni hozirgi 128 tadan 155 taga, undagi normalar esa 275 tadan 434 taga oshirilyapti. 128 ta moddaning 91 tasiga konseptual o‘zgarishlar kiritilmoqda. Umuman olganda, konstitutsiyaning 65 foiziga o‘zgartirish kiritilmoqda.

Jahongir Shirinov / Foto: Qonunchilik palatasi matbuot xizmati

Bu haqda Qonunchilik palatasi yalpi majlisida deputat Jahongir Shirinov ma’lum qildi.

“Natijada konstitutsiyamiz ham mazmunan, ham shaklan mutlaqo yangilanmoqda. Barchamizga ma’lumki, agar amaldagi qonun hujjati matnini sezilarli o‘zgartirish talab etilsa, uni yangi tahrirda bayon etish zarur. Shu boisdan hamda kiritilayotgan o‘zgartish va qo‘shimchalarning siyosiy ahamiyati va ko‘lamidan kelib chiqib, ko‘rib chiqilayotgan loyihada konstitutsiyani yangi tahrirda bayon etish uchun barcha asoslar yetarli.

Shuning uchun ham loyihaning nomini “Konstitutsiyaga o‘zgartirish va qo‘shimchalar kiritish to‘g‘risida” emas, balki “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi konstitutsiyaviy qonuni deb atash taklif etilmoqda.

O‘z navbatida loyihaning tarkibiy tuzilishi ham qayta ko‘rib chiqilib, Konstitutsiyamizga qo‘shilayotgan yangi moddalarga mustaqil raqamlar berilmoqda”, – dedi Shirinov.

#Konstitutsiya