11:51 / 24.03.2023
47159

Amudaryoda yangi qurilayotgan temiryo‘l ko‘prigining bir qismi qulab tushdi

Bu Qoraqalpog‘iston va Xorazmni bog‘lovchi, Amudaryo ustidan o‘tuvchi ko‘prikka olib boruvchi temiryo‘l ko‘prigi hisoblanadi. Loyiha buyurtmachisi «O‘zbekiston temiryo‘llari» AJ, bosh loyihachi «Boshtransloyiha» AJ, bosh pudratchi «O‘zbekiston temiryo‘llari» AJning tarkibiy bo‘linmalari hisoblanadi.

Foto: Telegram / @uzb_meteo

Qoraqalpog‘istonning Amudaryo tumanida 23 mart kuni yangi qurilayotgan temiryo‘l ko‘prigining bir qismi qulab tushdi.

Bu Amudaryo ustidan o‘tuvchi ko‘prikka olib boruvchi temiryo‘l ko‘prigi hisoblanadi. Ko‘prik qismining qulashiga olib keluvchi sabab aniq emas.

Tuman hokimligi holat yuzasidan munosabat bildirdi. Qayd etilishicha, Shavkat Mirziyoyevning Xorazm viloyatiga tashrifi davomida Qoraqalpog‘iston Respublikasi va Xorazm viloyatini bog‘lovchi Amudaryo ustiga avtomobil va temiryo‘l qo‘shma ko‘prigini qurish ishlari boshlangan.

Yangi ko‘prik qurilishi loyihasiga buyurtmachi etib «O‘zbekiston temiryo‘llari» aksiyadorlik jamiyati, bosh loyihachi etib «Boshtransloyiha» aksiyadorlik jamiyati, bosh pudratchi etib «O‘zbekiston temiryo‘llari» aksiyadorlik jamiyatining tarkibiy bo‘linmalari belgilangan.

Amudaryo tumani hududidan Xorazm viloyati hududiga temiryo‘l transporti tarmog‘ini yo‘lga qo‘yish maqsadida Amudaryo tumani hududining shimoliy qismidan o‘tuvchi A-380 G‘uzor–Buxoro–Nukus–Beynev avtomobli yo‘lining 717–718-kilometr oralig‘idan osma ko‘prik o‘tkazilgan.

Ushbu ko‘prikka 14-sonli ko‘prik qurilish otryadi tomonidan vaqtinchalik tayanch balkalar o‘rnatilgan. Mazkur balkalar ko‘prik qurilishida vaqtinchalik vazifa bajaruvchi, yordamchi vosita hisoblanadi. Hodisa oqibatida hech kim jabr ko‘rmagan.

Hozirda ushbu holatga oydinlik kiritish maqsadida Toshkent shahridan tegishli mutaxassislar va laboratoriya xodimlari chaqirilgan.

Mavzuga oid
Top