Rossiyada Haaga sudi faoliyatini taqiqlash taklif qilindi

Rossiya Davlat dumasi raisi Vyacheslav Volodin Rossiyada Haagadagi Xalqaro jinoiy sud (XJS) faoliyatini taqiqlashni, unga «yordam va qo‘llab-quvvatlov uchun» javobgarlikni joriy etishni taklif qildi. Bu haqda Volodin o‘zining Telegram-kanalida 25 mart, shanba kuni yozgan.

U 2002 yilda qabul qilingan AQShning harbiy xizmatchilarni himoya qilish to‘g‘risidagi qonunini misol qilib keltirdi, unda hech bir Amerika fuqarosi XJS orderi asosida hibsga olinishi yoki qo‘lga olinishi mumkin emas. Qonun, shuningdek, AQShga Haagadagi sud qo‘liga tushgan har qanday amerikalikni ozod qilish uchun harbiy kuch ishlatishga ruxsat beradi. Ushbu band tufayli Human Righs Watch inson huquqlari tashkiloti uni «Haagaga bostirib kirish haqidagi qonun» deb atagan. 

Volodin Xalqaro jinoiy sud qarorlari Rossiyada ijro etilmayotganini eslatib, endi «bu ishni davom ettirish to‘g‘ri» ekanini aytdi. «Mamlakatimiz hududida XJSning har qanday faoliyatini taqiqlovchi qonunchilikka o‘zgartirishlarni ishlab chiqish, shuningdek, XJSni targ‘ib qilish va qo‘llab-quvvatlash uchun javobgarlikni nazarda tutish kerak», deb yozadi Davlat dumasi spikeri. Volodin, shuningdek, «do‘st davlatlar» bilan XJS hamkorligi va unga yordam berishdan voz kechishni nazarda tutuvchi ikki tomonlama shartnomalar tuzishni taklif qildi. 

Bundan tashqari, Rossiya prezidentiga «xalqaro tuzilmalar Rossiya Konstitutsiyasi normalariga zid bo‘lgan qarorlar qabul qilgan taqdirda fuqarolarni himoya qilish uchun har qanday choralarni ko‘rish» huquqini berish kerak, deb hisoblaydi Volodin. 

17 mart kuni Haagadagi Xalqaro jinoiy sud Putinni hibsga olishga order berdi. XJS uni Ukrainaning bosib olingan hududlaridan bolalarni Rossiyaga majburan deportatsiya qilishga aloqadorlikda gumon qilmoqda. Kreml Rossiya bu sudning yurisdiksiyasini tan olmasligini eslatib, XJS   qarorini «g‘azablantiradigan» deb atadi. Rossiya Tashqi ishlar vazirligi orderning «muhim emas»ligini ma’lum qildi. Putinning o‘zi XJS   qaroriga izoh bermadi. 

Rossiya Xavfsizlik kengashi raisi o‘rinbosari Dmitriy Medvedev Putin ustidan sud bo‘ladigan bo‘lsa, XJS shtab-kvartirasiga raketa hujumi uyushtirish bilan tahdid qildi. «Haaga sudi binosi Shimoliy dengizdagi Rossiya kemasidan gipertovushli tashuvchi yordamida maqsadli nishonga olinishini tasavvur qilish mumkin. Shunday ekan, sudyalar, osmonga diqqat bilan qaranglar», deb yozadi Medvedev. Putinni order bilan hibsga olishga har qanday urinish Rossiyaga urush e’lon qilish bo‘ladi, dedi u.