YuNESKO Ukrainani yanada qo‘llab-quvvatlashga va’da berdi

Birlashgan Millatlar Tashkilotining Ta’lim, fan va madaniyat masalalari bo‘yicha tashkiloti (YuNESKO) Ukrainani yanada qo‘llab-quvvatlashga va’da berdi. 

«Urushning dastlabki kunlaridanoq YuNESKO Ukraina xalqini qo‘llab-quvvatlab, madaniyati, merosi, ta’limi va jurnalistlar xavfsizligini himoya qilishga yordam berdi», dedi YuNESKO bosh direktori Odri Azule Kiyevga ikki kunlik tashrifi chog‘ida. 

«Ushbu yordam 2023 yilda davom etadi va kengayadi», deya Azulening so‘zlari keltirilgan tashkilot press-relizida. 

Uning so‘zlariga ko‘ra, kelgusi haftalarda YuNESKO ta’lim uchun, birinchi navbatda, maktab o‘quvchilarini psixologik-ijtimoiy qo‘llab-quvvatlashni kuchaytirish uchun 10 million yevrodan ortiq mablag‘ni safarbar qiladi. 

YuNESKO bosh direktori Rossiyaning Ukrainaga qarshi urushi yetkazgan zarar juda katta ekanligini ta’kidladi – uni faqat madaniyat sohasida tiklash uchun keyingi 10 yil ichida 6,9 milliard dollar kerak bo‘ladi.