FIFA reytingi. O‘zbekiston uch pog‘ona yuqoriladi, Argentina peshqadamga aylandi

FIFA sayti mart oyida o‘tkazilgan rasmiy va o‘rtoqlik o‘yinlaridan keyin milliy jamoalarning yangi reytingini e’lon qildi.

Foto: O‘FA

Unga ko‘ra, O‘zbekiston milliy jamoasi 3 pog‘onaga yuqorilab, 74-o‘ringa ko‘tarildi. Srechko Katanets shogirdlari bungacha 77-o‘rinda edi. Mart oyida Saudiya Arabistonida Boliviya (1:0) va Venesuela (1:1) milliy jamoasi bilan o‘tkazilgan o‘rtoqlik o‘yinlaridan keyin milliy jamoamiz reytingda ko‘tarilgan.

FIFA reytingida Argentina milliy jamoasi 1-o‘ringa ko‘tarilib oldi. JCh-2022 chempioni 2017 yildan buyon ilk marta reytingda peshqadamga aylandi. Fransiya 2-o‘ringa ko‘tarilgan bo‘lsa, avvalgi yetakchi Braziliya 3-o‘ringa tushdi.

Keyingi o‘rinlarni Belgiya (4), Angliya (5), Niderlandiya (6), Xorvatiya (7), Italiya (8), Portugaliya (9) va Ispaniya (10) egallab turibdi.

Osiyo jamoalari orasida esa Yaponiya reytingda 20-o‘ringa ko‘tarilib, peshqadam sanaladi. Shuningdek, qit’ada top-10likdan Eron (24), Janubiy Koreya (27), Avstraliya (29), Saudiya Arabistoni (54), Qatar (61), Iroq (67), BAA (72), Ummon (73) va O‘zbekiston (74) joy olgan.

Qayd etish joiz, O‘zbekiston milliy jamoasi 74-o‘ringa ko‘tarilib, oxirgi 5 yillikdagi eng yaxshi natijasiga erishdi. Bungacha vakillarimiz 2018 yil fevral oyida 72-o‘ringa ko‘tarilgan, shundan so‘ng 95, 84, 83, 82, 77-o‘rinlarni egallagandi.

#FIFA reytingi