Tel-Avivda haydovchi odamlarga qarata o‘t ochdi va mashinani ular ustiga haydadi

Tel-Avivda 7 aprel, juma kuni kechqurun Pesax bayramini nishonlash vaqtida fuqarolarga avtomobil va o‘qotar quroldan foydalangan holda hujum uyushtirildi. Favqulodda xizmatlar ma’lumotlariga ko‘ra, noma’lum shaxs Kaufman ko‘chasida o‘tkinchilarga qarata o‘t ochgan, so‘ngra yaqin atrofdagi Charlz Klor bog‘ida olomon ustiga mashina haydagan. Mashina ag‘darilib ketgan, biroq, guvohlarning so‘zlariga ko‘ra, haydovchi jabrlanuvchilarga yordam bermoqchi bo‘lgan odamlarga qarata o‘q uzishda davom etgan.

AFP axborot agentligi xabar berishicha, hujumchining harakatlari natijasida kamida bir kishi halok bo‘lgan, yetti kishi yaralangan. Uning o‘zi huquq-tartibot idoralari xodimlari tomonidan «zararsizlantirildi» – Isroilning Walla portaliga ko‘ra, u voqea joyida o‘ldirilgan. Rasmiy idoralar uning shaxsi haqida batafsil ma’lumot bermayapti, biroq nashrning ta’kidlashicha, bu 45 yoshli «isroillik arab» bo‘lib, avvalroq mamlakat xavfsizlik xizmatlari e’tiboriga tushmagan. Hujum oqibatida halok bo‘lgan erkak italiyalik sayyohdir.

Isroil Tashqi ishlar vazirligi hodisani «terror hujumi» deb atadi. Voqea fonida Isroil bosh vaziri Binyamin Netanyaxu zaxiradagilar orasidan qo‘shimcha politsiya va harbiy kuchlarni safarbar qilishga chaqirdi.

7 aprel kuni ertalab Isroilda navbatdagi hujum uyushtirildi – Iordan daryosi hududida noma’lum shaxslar uch ayol bo‘lgan mashinaga qarata o‘q uzdi. Huquq-tartibot xodimlari versiyasiga ko‘ra, mashinaga boshqa mashinadan o‘t ochilgan, u boshqaruvni yo‘qotib, to‘xtagach, noma’lum shaxslar yo‘lovchilarga qarata o‘q uzgan. Natijada ikki qiz — 21 va 16 yoshli opa-singillar halok bo‘ldi, onasi esa shifoxonaga yetkazildi. Voqea sodir bo‘lgan hududda nazorat-o‘tkazish punktlari o‘rnatilgan, biroq hujumchilarning hibsga olingani haqida xabar berilmagan.

Pesaxning birinchi kuni, 5 aprelda Al-Aqso masjidida falastinliklar va Isroil xavfsizlik kuchlari o‘rtasida to‘qnashuvlar yuz berdi. OAV xabariga ko‘ra, tartibsizliklarga politsiyaning masjidda pirotexnika vositalari, tayoq va toshlar olib kelgan bir guruh yoshlarni haydab chiqarish operatsiyasi sabab bo‘lgan.

Shundan so‘ng, 6 aprel kuni Isroil Livan hududidan raketa zarbalariga uchradi. Isroil armiyasi ma’lumotlariga ko‘ra, mamlakat hududiga 34 ta raketa uchirilgan, ulardan 25 tasi havo hujumidan mudofaa tizimlari tomonidan muvaffaqiyatli tutib olingan.