100 ming gektardan ziyod yer maydoni qishloq xo‘jaligi sohasiga qayta foydalanishga kiritiladi

Prezidentning “2023 yilda qishloq xo‘jaligi mahsulotlari ishlab chiqarish, qayta ishlashni kengaytirish va qo‘llab-quvvatlashning qo‘shimcha chora-tadbirlari to‘g‘risida”gi qarori imzolandi.

Hujjat bilan 2023 yilda qishloq xo‘jaligi mahsulotlari yetishtirishning prognoz hajmlari tasdiqlanmoqda – jami 46 mln tonnadan ziyod.

2023 yilda 100 ming gektardan ziyod yer maydonlari qishloq xo‘jaligi sohasiga qayta foydalanishga kiritiladi.

Qoraqalpog‘iston Respublikasida chorvaga ozuqa yetishtirish uchun aholiga dehqon xo‘jaligi yuritish maqsadida beriladigan yerlarning maydoni 2 gektardan 5 gektarga oshiriladi.

Qaror bilan 2023 yilga mo‘ljallangan chora-tadbirlar dasturi tasdiqlangan bo‘lib, unda quyidagi tadbirlar ko‘zda tutilgan: 

• «Oziq-ovqat xavfsizligi to‘g‘risida»gi qonun loyihasini ishlab chiqish; 
• «Qishloq xo‘jaligi kooperativi» to‘g‘risida qonun qabul qilish; 
• hududlarda 10 ta agrologistika markazlari va 41 ta sovitkichli sig‘imlarni tashkil etish; 
• Ye-IJARA tizimi orqali aholiga 92,6 ming gektar yer maydonini dehqon xo‘jaligini tashkil etish maqsadida ochiq elektron tanlov orqali ajratish; 
• Qoraqalpog‘iston Respublikasi va Qashqadaryo viloyatida Avstraliyaning «Rubikon» kompaniyasi tajribasi asosida suv resurslarini boshqarish jarayonini avtomatlashtirish loyihasini amalga oshirish; 
• suv resurslaridan foydalanishni raqamlashtirish; 
• Qishloq xo‘jaligi vazirligining Geoaxborot tizimini internet tarmog‘iga joylashtirish va barcha foydalanuvchilar uchun erkin foydalanishni yo‘lga qo‘yish.