O‘zbekiston Oila va xotin-qizlar qo‘mitasi raisi Ozoda Parpiboyeva va Islom hamkorlik tashkiloti (IHT) huzuridagi Ayollar taraqqiyoti tashkiloti ijrochi direktori Afnan al-Shuaybiy o‘rtasida onlayn-uchrashuv o‘tkazildi, deb xabar bermoqda «Dunyo».
Uchrashuvda qayd etilganidek, O‘zbekistonda ayollarning boshqaruv lavozimidagi ulushi 33 foizga, tadbirkorlik sohasida 37 foizga, siyosiy partiyalarda 46 foizga, oliy ta’limda 48 foizga yetdi. Tashabbuskor va faol ayollardan 2 ming nafarga yaqini davlat va jamoat tashkilotlarida rahbarlik lavozimlarida xizmat qilmoqda.
Afnan al-Shuaybiy O‘zbekiston rahbariyatining xotin-qizlarga e’tibori, ularni qo‘llab-quvvatlash bo‘yicha sa’y-harakatini yuqori baholadi.
Muzokaralar natijasida qo‘shma tadbirlar o‘tkazish, xususan, joriy yil so‘nggiga qadar Samarqand shahrida Islom hamkorlik tashkilotiga a’zo mamlakatlar vakillari ishtirokida xotin-qizlarning jamiyatdagi rolini oshirishga bag‘ishlangan xalqaro konferensiya o‘tkazish bo‘yicha kelishuvga erishildi.
