Tezkor harakat kuchlari jangchilari Xartumdagi prezident saroyi va aeroport egallab olingani haqida xabar berishdi. Avvalroq RSF armiyani bazani og‘ir qurollardan o‘qqa tutganlikda ayblagan edi.
Sudanda 15 aprel, shanba kuni mamlakatdagi hukmron xunta va tezkor harakat kuchlari (RSF) o‘rtasida janglar boshlandi. RSF vakillari prezident saroyi - general Abdul Fattoh al-Burhon qarorgohi va poytaxt Xartumdagi xalqaro aeroportning egallab olingani haqida xabar berishdi. Bu ma’lumot hali mustaqil manbalar tomonidan tasdiqlanmagan.
Avvalroq RSF armiya o‘z bazalaridan birini qurshab olgani va uni og‘ir qurollardan o‘qqa tutgani haqida xabar bergan edi. Xorijiy muxbirlarga ko‘ra, Xartum ko‘chalarida qurol aravalari va zirhli texnikalar harakatlanmoqda. Guvohlarning xabar berishicha, Xartum va qo‘shni shaharlarda otishma sodir bo‘lgan.
Bir necha o‘n yil davomida mamlakatni boshqargan Umar al-Bashir 2019 yilda chuqur iqtisodiy inqirozga uchragan Sudandagi ommaviy norozilik namoyishlari fonida hokimiyatdan ag‘darilgan edi. Muntazam armiya va RSF o‘shanda xalq qo‘zg‘olonlarini birgalikda qo‘llab-quvvatladi.
Al-Bashir ag‘darilganidan so‘ng harbiylar va fuqarolik guruhlari o‘tish davri hukumatini tuzishga kelishib oldilar, biroq 2021 yil oktyabr oyida Sudanda davlat to‘ntarishi kuzatildi, natijada mamlakatdagi hokimiyat butunlay general al-Burhon qo‘liga o‘tdi. RSF rahbari Muhammad Hamdan Dagalo yaqinda Sudanni demokratiyaga olib borishga va’da bergan harakatga rahbarlik qila boshladi.
