Kiyev maslahatlashuvlar uchun Belarusdagi elchisini chaqirib oldi

Belarus rahbari Aleksandr Lukashenko Minskda Rossiya tomonidan tayinlangan «DXRning muvaqqat rahbari» Denis Pushilinni qabul qilganidan so‘ng, Ukraina 18 aprel, seshanba kuni o‘zining Belarusdagi elchisi Igor Kizimni maslahatlashuvlar uchun Kiyevga chaqirib olishini ma’lum qildi.

Ukraina Tashqi ishlar vazirligi bayonotida Lukashenko va Pushilin o‘rtasidagi uchrashuv «Donetskdagi Rossiya okkupatsion ma’muriyati vakilini qonuniylashtirishga (...) urinish» deb ataldi. «Og‘ir jinoyatlar sodir etgani uchun Ukraina tergovidan yashirinib yurgan, Ukraina va xalqaro sanksiyalar ostida bo‘lgan Rossiya okkupatsion ma’muriyati vakili bilan uchrashuvni Belarus Respublikasining tajovuzkorni qo‘llab-quvvatlashga qaratilgan navbatdagi ochiq-oydin nodo‘stona harakati, deb hisoblaymiz», - deya bayonot berdi Ukraina vazirligi.

Shu bilan birga, Kiyev Minskni «bunday buzg‘unchi qadamlardan tiyilishga va Rossiyaning Ukrainaga qarshi agressiv urushini qo‘llab-quvvatlashni to‘xtatishga» chaqirdi.

«DXR rahbari vazifasini bajaruvchi» Denis Pushilin 18 aprel kuni Minskda Belarus rahbari Aleksandr Lukashenko bilan uchrashdi. Lukashenko matbuot xizmatining xabar berishicha, bu uchrashuvda u Pushilindan Belarus Donetskka qanday yordam bera olishini so‘ragan.