Toshkentda enagaga tashlab ketilgan 3 yoshli qiz uning xonadonida vafot etdi

Ijtimoiy tarmoqlarda 3 yoshar qizning o‘limi holati yuzasidan videomurojaat tarqalib, turli muhokamalarga sabab bo‘lmoqda. Toshkent shahar IIBB mazkur holat yuzasidan ma’lumot berdi.

Foto: Getty Images

Qayd etilishicha, joriy yilning 25 aprel kuni 1996 yilda tug‘ilgan D.U. Sergeli tumani IIO FMBga ariza bilan murojaat qilib, sinfdoshi, 1996 yilda tug‘ilgan Sh.N.ga voyaga yetmagan farzandi, 2020 yilda tug‘ilgan S.U.ni enagalik qilishi uchun topshirganini, lekin farzandi uning xonadonida vafot etganini ma’lum qilgan.

Tekshiruv jarayonida Sh.N. voyaga yetmagan S.U. 24 aprel kuni yerto‘laga tushish zinasidan yiqilganini, lekin o‘rnidan turib yana o‘ynab ketgani sababli uning onasiga bu haqida xabar bermaganini, shifokorlarga ham S.U.ga tibbiy yordam ko‘rsatishi uchun murojaat qilmaganini, 25 aprel kuni taxminan soat 10:00 larda S.U. hushidan ketib yiqilganini va tez tibbiy yordam xodimlari kelguniga qadar vafot etganini ma’lum qilgan.

3 yoshli qizning o‘lim sababini aniqlash maqsadida sudga oid tibbiyot ekspertizasi tayinlangan.

Mazkur holat yuzasidan Sergeli tumani IIO FMB tomonidan Jinoyat kodeksining 117-moddasi (“Xavf ostida qoldirish”) bilan jinoyat ishi qo‘zg‘atilgan. Gumon qilinuvchi Sh.N. protsessual tartibda ushlangan. Tergov davom etmoqda.

#Sergeli #enaga