Kun.uz Qashqadaryo viloyati IIB axborot xizmatidan olgan ma’lumotga ko‘ra, voqea kecha, 5 may kuni Qamashi tumanidagi Chim dehqon bozorida sodir bo‘lgan.
“2023 yil 5 may kuni Qamashi tumani Chim dehqon bozorida bir nafar fuqaro yelkasiga O‘zbekiston Respublikasi bayrog‘ini taqib yurgani bozorda xizmat o‘tayotgan Qamashi tumani IIB JXX HPB TP profilaktika inspektorlari tomonidan aniqlangan.
Fuqaro to‘xtatilib, O‘zbekiston Respublikasining “Davlat ramzlari to‘g‘risida”gi qonun talablariga ko‘ra bayroqni bunday olib yurish mumkin emasligini, uni yechib qo‘yib davlat ramzlariga hurmatsizlik qilmasligini tushuntirganida, fuqaro IIB xodimlarining qonuniy talablariga bo‘ysunmasdan, qarshilik ko‘rsatgan.
Natijada belgilangan tartibda Qamashi tumanida yashovchi fuqaro R.I. bilan profilaktik suhbat o‘tkazilgan”, deyiladi viloyat IIB axborot xizmati ma’lumotida.
Holat yuzasidan fuqaroga MJtKning “tegishli moddalari”ga ko‘ra hujjatlar rasmiylashtirilib, to‘plangan hujjatlar qonuniy to‘xtamga kelish uchun jinoyat ishlari bo‘yicha Qamashi tuman sudiga yuborilgan.
Shu o‘rinda IIB xodimlarining xatti-harakatlari yuzasidan ba’zi savollar kelib chiqmoqda.
Bir tomondan, ular qonun bo‘yicha harakat qilgan. Chunki 1991 yil 18 noyabrda qabul qilingan “O‘zbekiston Respublikasining davlat bayrog‘i haqida”gi qonunning 5-2-moddasida shunday deyilgan:
“O‘zbekiston Respublikasi Davlat bayrog‘ining elementlarini nodavlat tashkilotlari hujjatlarining rekvizitlari yoki reklama materiallariga kiritilishiga yo‘l qo‘yilmaydi.
O‘zbekiston Respublikasi Davlat bayrog‘ining tasviri tushirilgan belgilardan ishlab chiqarilayotgan yoki realizatsiya qilinayotgan tovarlarni (ishlarni, xizmatlarni) o‘tkazish uchun tijorat maqsadlarida foydalanish mumkin emas.
Nodavlat notijorat tashkilotlarining ramzlari O‘zbekiston Respublikasining Davlat bayrog‘iga o‘xshash bo‘lishi mumkin emas”.
