Qoʻshimcha funksionallar
-
Tungi ko‘rinish
Hafta davomida havo harorati asta-sekin ko‘tariladi
Bugun va ish haftasi davomida O‘zbekiston hududi bo‘yicha havo asosan kam bulutli va quruq bo‘lishi kutilmoqda.
“O‘zgidromet” xabariga ko‘ra, havo harorati asta-sekin ko‘tariladi va hafta o‘rtasiga borib kechalari +13...+18 darajani, kunduz kunlari +30...+35 darajani tashkil etadi, janubda va cho‘l hududlarda +36...+38 darajagacha bo‘ladi. Bu may oyining ushbu davri uchun o‘rtacha ko‘p yillik qiymatlardan 5-7 darajaga yuqoridir.
12 mayda respublika hududiga Turkmaniston hududlaridan nisbatan nam havo kirib keladi. Toshkent, Samarqand, Jizzax, Sirdaryo, Qashqadaryo, Surxondaryo viloyatlarida ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin. Kunduzgi havo harorati 2-3 darajaga pasayadi va +27...+32 darajani tashkil etadi.
8-9 may kunlari shimolda, 11-12 may kunlari esa respublika bo‘yicha ba’zi joylarda shamol tezligi 13-18 m/s gacha kuchayishi, ayrim joylarda chang-to‘zonlar bilan kuzatilishi mumkin. Tog‘oldi va tog‘li hududlarda 8 va 11-12 mayda momaqaldiroq bilan mahalliy yomg‘irlar yog‘ishi mumkin.
Poytaxtda 8-11 mayda havo asosan kam bulutli bo‘ladi, yog‘ingarchilik kutilmaydi. Harorati 8 mayda +25...+27 darajagacha, 10-11 may kunlari +32...+34 darajagacha asta-sekin ko‘tariladi.
12 mayda qisqa muddatli yomg‘ir yog‘ishi, momaqaldiroq bo‘lishi mumkin. Kunduzgi harorat nisbatan pasayadi.
