Armaniston va Ozarboyjon bir-birini otishmada aybladi

Armaniston va Ozarboyjon bir-birini o‘z hududlarini o‘qqa tutishda aybladi. 11 may, payshanba kuni Armaniston Mudofaa vazirligi Ozarboyjon qo‘shinlari Armaniston sharqidagi Sotk aholi punkti yo‘nalishidagi arman pozitsiyalarini artilleriya va minomyotlardan o‘qqa tutgani, natijada ikki arman askari yaralangani haqida xabar berdi.

Xabarda qayd etilishicha, “Armaniston qurolli kuchlari bo‘linmalari tegishli mudofaa choralarini ko‘rmoqda”. Armaniston Mudofaa vazirligi, shuningdek, Ozarboyjon mudofaa vazirligining arman askarlari otishma boshlagani, natijada bir ozarboyjonlik askar yaralangani haqidagi xabarini dezinformatsiya deb atadi.

O‘z navbatida, Ozarboyjon Mudofaa vazirligi arman qo‘shinlarini sulhni buzganlikda va qasddan provokatsiyada aybladi. "Armaniston Qurolli kuchlari bo‘linmalari Basarkechyar viloyatining Zod yo‘nalishidagi pozitsiyalaridan Ozarboyjon armiyasini turli o‘qotar qurollaridan intensiv o‘qqa tutdi. Dushman tomonidan nishonga olingan o‘qlar natijasida ozarboyjonlik harbiy xizmatchi og‘ir yaralangan”, — deyiladi Ozarboyjon harbiy idorasi bayonotida.

Xabarda, shuningdek, Ozarboyjon hududini o‘qqa tutish davom etayotgani, “Armaniston Qurolli kuchlari yirik kalibrli qurol va minomyotlardan faol foydalanayotgani” aytilgan.

Shu bilan birga, Ozarboyjonning harbiy yangiliklarga ixtisoslashgan Caliber nashri Armaniston chegaradagi Ozarboyjon pozitsiyalariga zarba berish uchun kamikadze dronlardan faol foydalanayotganini yozmoqda. Dronlar Eronda ishlab chiqarilgan bo‘lishi mumkin bo‘lgan, kamida beshta kuchli portlash qayd etilgan.

Ikki sobiq sovet respublikasi - Armaniston va Ozarboyjon - asosan etnik armanlar yashaydigan Ozarboyjonning Tog‘li Qorabog‘ini nazorat qilish uchun o‘nlab yillar davomida kurashib keladi.

Ozarboyjon va Armaniston prezidentlari Ilhom Aliyev va Nikol Pashinyan 14 may, yakshanba kuni Bryusselda mojaroni tartibga solishga erishish uchun uch tomonlama uchrashuv o‘tkazadi.