10:29 / 11.05.2023
10779

Ukraina: Qora dengizda Rossiyaning 17 ta harbiy kemasi bor

Rossiyaning 17 ta harbiy kemasi Qora dengizda jangovar navbatchilik qilmoqda. Bu haqda Ukraina harbiy-dengiz kuchlari xabar berdi.

Foto: 5ua

Qayd etilishicha, Qora dengizdagi kemalar orasida, jumladan 3 ta “Kalibr” qanotli raketa tashuvchisi ham mavjud. 

Shu bilan birga, Azov dengizida Rossiya harbiy-dengiz kuchlarining 2 ta kemasi, O‘rta Yer dengizida esa 5 tagacha kemasi, shu jumladan, bitta "Kalibr"larga ega raketa tashuvchi bor, deya qo‘shimcha qildi Ukraina tomoni.

Avvalroq Rossiya Qora dengiz floti kemalari Mikolayivga raketa zarbalari bergandi.

27 aprelga o‘tar kechasi Rossiya qo‘shinlari Mikolayivni o‘qqa tutdi, shaharga 4 ta "Kalibr" raketalari otildi, deb xabar berdi shahar rahbari Aleksandr Senkevich. Dekabr oxiridan beri Mikolayivda bunday hujumlar bo‘lmagan, dedi u OAV efirida. 

Senkevichning so‘zlariga ko‘ra, raketalar turar joy binolariga tushgan, zarba berilgan joy yaqinida harbiy obektlar yo‘q, hozirda shaharda ham harbiylar deyarli qolmagan. 

Ukraina Favqulodda vaziyatlar davlat xizmati ma’lumotlariga ko‘ra, raketa hujumi natijasida bir kishi halok bo‘lgan, 23 kishi, jumladan bir bola jarohatlangan.

Ukraina prezidenti Volodimir Zelenskiy "Kalibr" raketalari Qora dengizdan uchirilganini, "yuqori aniqlikdagi qurollar xususiy uylar, tarixiy bino va ko‘p qavatli binoga qaratilgan"ini aytdi. 

Mavzu
Rossiya-Ukraina urushi
2022 yil 22 fevral kuni Rossiya Ukraina chegarasidan o‘tib, qo‘shni mamlakatga bostirib kirdi. Ukraina armiyasi jang taklif qildi.
Barchasi
Top