Rossiyalik og‘ir atletikachilar musobaqalarda neytral maqomda qatnashishi mumkin bo‘ladi

Xalqaro og‘ir atletika federatsiyasi (IWF) Rossiya va Belarus sportchilariga o‘z shafeligida o‘tkaziladigan musobaqalarda neytral maqomda ishtirok etishga ruxsat berdi. Bu haqda 12 may, juma kuni federatsiya ijroiya kengashining onlayn yig‘ilishi yakunlari bo‘yicha ISW matbuot xizmati xabar berdi.

Gap Xalqaro olimpiya qo‘mitasi (XOQ) tavsiyalarini qo‘llash haqida ketmoqda. Ushbu jarayon doirasida mustaqil idoralar tomonidan xizmat ko‘rsatuvchi xodimlar va IWF musobaqalarida qatnashmoqchi bo‘lgan Rossiya yoki Belarus pasportiga ega barcha sportchilar bo‘yicha individual tekshiruvlar o‘tkaziladi.

Qaror IWF sportchilar komissiyasi tomonidan qo‘llab-quvvatlandi. Federatsiya ma’lumotlariga ko‘ra, gap “IWF'ning Ukraina bilan birdamligi va millatidan qat’i nazar, barcha neytral sportchilar uchun sport bilan shug‘ullanish imkoniyatini imkon qadar saqlab qolish zarurati” pozitsiyasi o‘rtasidagi eng yaxshi muvozanat haqida ketmoqda.

Matbuot xizmati joriy inqiroz boshidan buyon ular XOQ tavsiyalariga qat’iy rioya qilganliklarini ta’kidladi.

29 aprel kuni Xalqaro dzyudo federatsiyasi rossiyaliklar va belaruslar Ukrainadagi Rossiya urushi tashviqotini qo‘llab-quvvatlayaptimi yoki yo‘qmi, shu masalani tekshirgandan so‘ng ularga ruxsat berish bo‘yicha individual qarorlar qabul qilishi ma’lum bo‘ldi.

Bungacha, 28 mart kuni, to‘rt oylik maslahatlashuvlardan so‘ng XOQ Ijroiya qo‘mitasi Parijda 2024 yilda bo‘lib o‘tadigan Olimpiada bo‘yicha qarorni keyinga qoldirib, xalqaro federatsiyalarga urushni qo‘llab-quvvatlamagan rossiyalik va belaruslik sportchilarga neytral sportchilar sifatida qatnashishga ruxsat berishni tavsiya qildi.