AQSh yaqin oylarda Ukrainaga F-16’ni berish haqida qaror qabul qiladi

Kiyevga qurol-yarog‘, jumladan F-16 qiruvchi samolyotlarini yetkazib berish masalasida Qo‘shma Shtatlar jang maydonidagi vaziyatning rivojini hisobga oladi, deb tushuntirdi Oq uy vakili.

F-16 qiruvchisi

AQShning Ukrainaga qurol yetkazib berish bo‘yicha siyosati o‘zgarmadi va Oq uyning «qiruvchi samolyotlar koalitsiyasi»ni qo‘llab-quvvatlash haqidagi qarori harbiy vaziyatning rivojiga mos keladi, dedi AQSh prezidentining milliy xavfsizlik bo‘yicha maslahatchisi Jyeyk Sallivan 20 may, shanba kuni jurnalistlarga.

«Hech narsa o‘zgarmadi. Ukrainani qurol-yarog‘, yordam va mashg‘ulotlar bilan ta’minlashga bo‘lgan yondashuvimiz urush rivojiga mos keladi», - deb javob berdi Sallivan fevral oyida prezident Jo Bayden Kiyevga F-16 qiruvchi samolyotlarini berish zarurati yo‘qligi haqida gapirganini eslatgan jurnalistlarning savoliga.

«Fevral oyida prezident biz Ukrainani muvaffaqiyatli qarshi hujumni amalga oshirish uchun zarur bo‘lgan hamma narsa bilan ta’minlashga e’tibor qaratganimizni nazarda tutgan edi. Bu turli xil qurollar aralashmasi edi. F-16 unga kiritilmagan», - deya ta’kidladi Sallivan.

«Endi biz va’da qilgan hamma narsani bajardik, kelajakka qarash va Ukrainaga Rossiya agressiyasidan himoyalanish uchun nima kerakligini tushunish vaqti keldi», dedi Sallivan. U ukrainalik uchuvchilarni tayyorlash qancha vaqt olishi va Kiyevga samolyotlar yetkazib berish bo‘yicha aniq qaror qachon qabul qilinishi mumkinligi haqida izoh bermadi.