Ijtimoiy tarmoqlarda nominal qiymati 400 000 so‘m bo‘lgan yangi banknotning surati tarqalmoqda.
Markaziy bank matbuot xizmati 400 000 so‘mlik nominaldagi yangi banknot haqidagi xabarlar haqiqatga to‘g‘ri kelmasligini aytdi.
Suratda 100 000 so‘mlik banknotning dizayni borligi ta’kidlandi. Regulyator yangi banknot muomalaga chiqarilsa, bu haqda rasman e’lon qilinishini eslatdi.
2022 yil iyul oyida nominal qiymati 200 000 so‘m bo‘lgan banknot muomalaga kiritildi.
O‘zbekistonda 2022 yil dekabr oyidan boshlab nominal qiymati 1000 so‘m bo‘lgan tangalar chiqarildi.
2021 yil iyun oyida Markaziy bank 2000 va 20 000 so‘mlik nominaldagi yangi pul belgilarini muomalaga chiqarishi ma’lum bo‘ldi. Umuman olganda, 2021 yil davomida 2000 va 20 000 so‘mlik banknotlarning yangi nominallari, 5 000 va 10 000 so‘mlik yangi banknotlar ham muomalaga chiqarildi.
Shundan so‘ng, dekabr oyida 50 000 va 100 000 so‘mlik banknotlar ham yangilandi.
