Kiyev Berlindan Taurus qanotli raketalarini so‘radi

Ukraina Germaniyaga Taurus qanotli raketalarini yetkazib berish bo‘yicha so‘rov yubordi. Ushbu yuqori aniqlikdagi boshqariladigan raketalarning masofasi - 500 kmgacha.

Foto: Kun.uzCombatAir

Germaniya Mudofaa vazirligi rasmiy so‘rov olinganini tasdiqlagan. Idora Kiyev ushbu turdagi nechta raketalarni qabul qilib olishni kutayotganiga aniqlik kiritmadi.

Avvalroq XDI mudofaa eksperti Roderix Kizevetter nemis qanotli raketalarini Kiyevga topshirishga undagan edi. Bu Ukraina Qurolli kuchlariga "ruslarning harbiy infratuzilmasiga front chizig‘idan ancha uzoqdan zarba berish imkonini yaratadi", deb ta’kidladi ekspert.

Germaniya mudofaa vaziri Boris Pistorius GFRning Ukraina uchun "qiruvchilar koalitsiyasi"da keng ishtirok etishi ehtimolini rad etdi. "Buning imkoniyatlari nihoyatda cheklangan va hozirda o‘rganilmoqda", - deya tushuntirdi Pistorius 23 may kuni Bryusselda bo‘lib o‘tgan Yevropa Ittifoqi mudofaa vazirlarining konferensiyasi chog‘ida.

Bundan tashqari, Boris Pistorius Ukrainaga Germaniyaning Taurus tipidagi qanotli raketalarini yetkazib berish taklifiga vazmin munosabat bildirdi. Vazir har bir alohida qurol tizimi haqida munozaraga kirishni va faraziy savollarga faraziy javob berishni istamasligini aytdi.