Kimlar ketib, kimlar qoladi: yozda shartnomasi tugayotgan yulduzlar

May oyida «Liverpul» braziliyalik futbolchisi shartnomasini uzaytirmagani va klubni tark etishini e’lon qildi. Firmino jamoa bilan ideal darajada xayrlashdi. Avvaliga APLning so‘nggi ikki turida gol urdi. Keyin «Liverpul»dagi jamoadoshlari, klub xodimlari, do‘stlar va oila a’zolari uchun sovg‘alar solingan 200 quti tayyorlab tarqatdi. Roberto hali top-darajada bir necha yil o‘ynashi mumkin: braziliyalik hujumchiga «Barselona» va «Inter» qiziqmoqda.

Jyeyms Milner, 37 yosh, «Liverpul»

Angliyalik futbolchi shu yoshida ham talabgir bo‘lib qolmoqda. Milner «Liverpul»dan ketishi ikki hafta oldin ma’lum bo‘ldi, ammo u ko‘p vaqt bekor qolmadi. Ushbu faxriy futbolchi yaqin vaqtlar ichida «Brayton» bilan shartnoma imzolashi kutilmoqda, o‘z tarixida ilk bor yevrokuboklarga chiqqan ushbu jamoaga tajribali yarimhimoyachi kerak. Jyeyms sakkiz yil «Liverpul» uchun jon kuydirib o‘ynadi (332 o‘yin), «Enfild» xodimlari esa unga original sovg‘a tayyorlashdi.

Klub afsonasi bilan xayrlashuv vaqtida unga stadion gazonidan bir parcha ajratib berishdi. Aynan penalti tepiladigan nuqtadan. Milner sakkiz yil mobaynida 11 metrlik jarima zarbalarini amalga oshirib kelgan va «Enfild» xodimlariga doim ish topib bergan. Stadion xodimlari har safar bu joyni yangilashiga to‘g‘ri kelgan. «Qadrli Jyeyms, penalti nuqtasi uchun endi o‘zing qayg‘urasan», — deyilgan gazon parchasiga qo‘shib berilgan hazil otkritkada.

Nabi Keyta, 28 yosh, «Liverpul»

Ingliz klubi ushbu yarimhimoyachini 2018 yil yozida katta mablag‘ sarflab sotib olgandi. Afrikalik futbolchi transferi «Liverpul»ga 60 mln yevroga (Transfermarkt ma’lumoti) tushgan. Milner va Firminodan farqli o‘laroq, Keyta «Liverpul»da yaxshi o‘ynab keta olmadi. 2022/2023 yillar mavsumi Nabi uchun juda yomon o‘tdi. U mavsumning birinchi qismini jarohatlar tufayli o‘tkazib yubordi, ikkinchi davrada esa barcha turnirlar doirasida atigi 13 o‘yinda maydonga tushdi (jami 487 daqiqa). Taqqoslash uchun — o‘tgan mavsumda Keyta 40 o‘yinda maydonda bo‘lgan (2088 daqiqa). OAVdagi xabarlarga ko‘ra, Nabi faoliyatini «Barsa» yoki «Milan»da davom ettirishga yaqin.

Serxio Buskets, 34 yosh, «Barselona»

Ko‘k-anorranglilar klubini Gvardiolaning shonli jamoasining so‘nggi ramzi ham tark etmoqda. U kataloniyaliklar klubining yoshlar jamoasida ter to‘kkan, ikki jamoa uchun o‘ynagan, 2008 yildan buyon 15 mavsum davomida asosiy tarkibning almashtirib bo‘lmas futbolchisi bo‘lgan. Serxio «Barsa» uchun 722 o‘yin o‘tkazgan. Klub 34 yoshli futbolchiga bu mavsumda ham ishonch bildirdi va u 42 o‘yinda maydonga chiqib, klubdagi faoliyatini yuqori notada yakunladi. Bu mavsumdagi chempionlik Serxio uchun kataloniyaliklar safidagi 32-sovrin bo‘ldi. Bundan ko‘prog‘i faqat Messida (35).

Moliyaviy masalalar barchasidan muhimroq bo‘lib chiqdi. Busketsning klubdagi ahamiyatini «Barselona» bosh murabbiyi Xavining so‘zlari ham ko‘rsatib turibdi. U Serxioga o‘rinbosar topish klub uchun yozgi transferlar oynasidagi ustuvor vazifa ekanini aytdi. Endi ko‘k-anorranglilarga yuqori darajadagi tayanch yarimhimoyachisi kerak. Buskets esa faoliyatini yakunlayotgani yo‘q: Mundo Deportivo gazetasi yozishicha, ispaniyalik futbolchini Saudiya Arabistoni va AQShdagi klublar o‘ziga chorlamoqda.

Jordi Alba, 34 yosh, «Barselona»

Albaning raqamlari Busketsnikidan kamtarroq, ammo u ham «Barsa» afsonasi deb atalishga haqli. Nima bo‘lganda ham Jordi jamoa uchun 11 yil o‘ynab bergan (459 o‘yin) va 18 sovrin qo‘lga kiritgan. Bu mavsumda ham 30 o‘yinda ishtirok etdi. Ispaniyadagi insayderlar xabar qilishicha, Alba klubning kattagina qarzidan kechgan, u bu pullarni bonus sifatida olishi kerak edi.

Lionel Messi Albaning ketishiga munosabat bildirdi va unga bo‘lajak klubida muvaffaqiyat tiladi. Jordining shartnomasida kelishuvni yana bir yilga uzaytirish bo‘yicha band bo‘lgan, ammo tomonlar kelishgan holda xayrlashgan. Mundo Deportivo ma’lumotiga ko‘ra, futbolchi faoliyatini davom ettirishi uchun variantlardan biri — «Atletiko» klubi bo‘lib turibdi.

Lukas Moura, 30 yosh, «Tottenhem»

Braziliyalik futbolchi «PSJ»dan kelganidan besh yarim yil o‘tib London klubini tark etmoqda. 2019 yilda Moura Chempionlar ligasida o‘zining eng yorqin o‘yinini o‘tkazgandi. Uning yarimfinalda «Ayaks»ga qarshi javob o‘yinidagi gollari raqibni shokka tushirgandi (3:2). Londonliklar o‘shanda birinchi o‘yinda o‘z uyida 0:1 hisobida yutqazishgan, javob o‘yinining birinchi bo‘limida ikkita gol o‘tkazib yuborgandi, keyin esa faqat Moura gol uradi. Uning uchinchi goli «Ayaks»ni taslim etadi — amsterdamliklarda endi javob qaytarish uchun kuch ham, vaqt ham qolmagandi. Yakunlangan mavsumda Moura avvaliga jarohat tufayli o‘ynay olmadi, ikkinchi davrada esa unga juda kam imkoniyat berildi.

Rafael Gerreyru, 29 yosh, «Borussiya» D

Yetti yil muqaddam dortmundliklar klubi uni kamtargina «Loryan»dan olib kelish uchun 12 mln yevro sarflashgandi. Tomonlarda xayrlashuv uchun fantastik lahzalar bo‘lishi mumkin edi. «Borussiya»ni uzoq kutilgan chempionlikdan 90 daqiqa ajratib turgandi, ammo o‘yin yakunlangandan keyin barcha futbolchilar alam bilan gazonga yiqilishdi.

Keyingi kuni Gerreyru klub bilan xayrlashdi va ko‘z yoshlarini tiyib tura olmadi. Umuman olganda, Gerreyru juda kuchli mavsum o‘tkazdi — 36 o‘yinda 6 gol va 14 pas. WhoScored portali portugaliyalik himoyachini Bundesligada mavsumning ramziy jamoasiga kiritgani bejiz emas.

Milan Shkrinyar, 28 yosh, «Inter»

Shkrinyar — erkin agentga aylanishi mumkin bo‘lgan futbolchilar orasida eng qimmatbahosi: Transfermarkt himoyachining transfer qiymatini 60 million yevroga baholagan. Albatta, bu mavsum ikki oydan oshiq vaqt maydonga tusha olmaganiga qaramay, Shkrinyarga talab bor. Katta ehtimol bilan, slovakiyalikning keyingi klubi «PSJ» bo‘ladi.

Yuri Tilemans, 26 yosh, «Lester»

Tilemans «Lester»ni o‘tgan yil yozida tark etishi kutilgandi — «Arsenal» ushbu belgiyalikni transfer qilishga qattiq uringan, ammo kelishuv barbod bo‘lgandi. Endi barchasi hal bo‘lgan: «tulkilar» APLda qola olmadi va ularning asosiy aktivlaridan biri tekinga ketadi. Qayergaligi — hozircha aniq emas. «Arsenal» hozircha bu variantga qaytmadi, ammo belgiyalik futbolchiga londonliklar klubida ish topilishi aniq.

Markus Tyuram, 25 yosh, «Borussiya» M

Lilian Tyuramning o‘g‘li bundesligada porlaganiga bir necha yil bo‘ldi va u allaqachon Menxengladbahning «Borussiya» klubi darajasidan o‘zib ketgan. Klub allaqachon fransuz yozda ketishini e’lon qildi, ammo hozircha uning keyingi manzili aniq emas: da’vogarlar — «Inter», «Bavariya» va APL klublari.

Ketishi mumkin

Karim Benzema, 35 yosh, «Real»

«Oltin to‘p» sohibi «Real» bilan shartnomasini yana bir yilga uzaytirishi hal bo‘lgani haqida xabarlar bor edi, ammo so‘nggi kunlarda vaziyat jiddiy o‘zgardi.

Benzema Saudiya Arabistoni klubidan taklif olgan: yiliga 200 mln yevrodan to‘lashni nazarda tutuvchi ikki yillik shartnoma (soliqlar chiqarib tashlanganda). «Real»dagilar Benzema klub bilan xayrlashish haqida jiddiy o‘ylamoqda, deb hisoblamoqda. Madrid klubi ichidagi vaziyatdan yaxshi xabardor bo‘lgan AS xabarida u «ketishga yaqin» ekani aytilgan. «Real» rahbariyati yoshi o‘tib borayotgan Karimning ketishiga to‘sqinlik qilmaydi, qolaversa, u Yevropa jamoasiga ketayotgani yo‘q.

Joriy mavsumda «Real» safida u jami 42 o‘yinda 30 gol urib, 6 golga uzatma berdi. Lekin uning yillik maoshi ham kam emas - bonuslardan tashqari 13,2 mln yevro. 

Luka Modrich, 37 yosh, «Real»

Toni Kroosdan farqli ravishda, Modrichning Madriddagi kelajagi noaniqligicha qolmoqda. Bu mantiqiy: xorvatiyalik yarimhimoyachi germaniyalik jamoadoshidan to‘rt yarim yosh katta va bu mavsumda undagi o‘yin amaliyoti sezilarli darajada qisqardi. Ammo hali ham xorvatiyalik futbolchi «Real»da yana bir mavsumga qolishi, keyingi yilda ketishi haqida ma’lumotlar bor.

Serxio Ramos, 37 yosh, «PSJ»

Modrich bilan bo‘lganidek, Ramosning shartnomasini yangilashiga yoshi to‘siq bo‘lmoqda. Ammo ispaniyalik futbolchining o‘ziga xos ustunliklari ham bor: u bu mavsumda ko‘proq o‘ynadi va uning jamoa o‘yiniga ta’siri kengaydi. «PSJ» bunday tajribali futbolchini tarkibda saqlab qolishdan manfaatdor.

Anxel Di Mariya, 35 yosh, «Yuventus»

Di Mariya jahon chempionatida Argentina uchun muhim figura bo‘lgandi, ammo uning «Yuventus»dagi o‘yini barqaror bo‘lmadi. U ayrim bahslarda porladi, masalan, Yevropa Ligasida «Nant»ga qarshi o‘yindagi het-trigi bilan jamoani keyingi bosqichga olib o‘tdi, ammo Di Mariya ichki chempionatda hamisha ham yordam bera olmadi. Qolaversa, argentinalikning o‘zi ham vataniga, «Rosario Sentral» klubiga qaytishni istamoqda — endi unda jahon chempionati uchun Yevropada o‘ynashga zarurat yo‘q, shunday ekan faoliyatining oxirgi yillarini uyda o‘tkazish mumkin.

Ilkay Gundo‘g‘an, 32 yosh, «Manchester Siti»

Yaqin vaqtlargacha «Manchester Siti» sardori yozda «Barselona»ga o‘tishi hal bo‘lgan masaladek ko‘rinayotgandi — nemis futbolchisining shartnomasi muddati tugayapti, katalonlar esa unga asosiy tarkibda joy berishga tayyor. Ammo Gundo‘g‘anning mavsum oxiridagi yorqin o‘yinlari, shuningdek Kalvin Fillips yaxshi formada emasligi «Siti»ni qayta o‘ylab ko‘rib, havbekni saqlab qolishga undashi mumkin.

Qolishi deyarli aniq

Ngolo Kante, 32 yosh, «Chelsi»

Butun mavsum ushbu fransuzning boshqa yillaridan butunlay farqlicha kechdi — u jahon chempionatini o‘tkazib yubordi va «Chelsi»ning qulashini bir chetda turib kuzatishga majbur bo‘ldi. Bu yil londonliklar amaldagi futbolchilariga emas, yangi xaridlarga ko‘proq e’tibor qaratdi, Kantening sog‘ligidagi muammolar esa muzokaralar jarayonini yanada murakkablashtirdi. Ammo u ikkinchi davrada maydonga qaytdi, «Chelsi»ning yangi egalari ham ushbu fransuzning jamoaga kerakligini his qilishmoqda va unga yangi shartnoma taklif etishi tayin.

David De Xea, 32 yosh, «Manchester Yunayted»

Ispaniyalik darvozabon 12 yildan buyon «Old Trafford»da. «MYu»ni De Xeasiz tasavvur qilish qiyin, ammo uning pozitsiyasi hozir unchalik mustahkam emas. Shunga qaramay, «Yunayted» darvozabon bilan shartnomani uzaytirmoqchi, lekin hozircha yangi shartlar uni qoniqtirmayapti. Katta ehtimol bilan, yakunda tomonlar til topishib olishadi.

Toni Kroos, 33 yosh, «Real»

Kroos — Modrich — Kazemiro triosi bir yil ichida tarqalib ketdi: braziliyalik allaqachon «MYu»da. Endi xorvatiyalik va nemis yarimhimoyachilar kelajagi ham mavhum bo‘lib turibdi, ularning ikkisining ham shartnomasi muddati shu yozda tugaydi. Lekin Kroosning vaziyati osonroq: katta ehtimol bilan «Real» u bilan shartnoma uzaytirilganini e’lon qiladi. Germaniyalik futbolchi faoliyatini Madridda yakunlashni maqsad qilgan.