Ishsiz fuqarolar qanday holatda pensiya olish huquqiga ega bo‘ladi?

“Fuqarolarning davlat pensiya ta’minoti to‘g‘risida”gi qonunda erkaklar 60 yoshga, ayollar 55 yoshga to‘lganda, ularga to‘liq pensiya tayinlanishi belgilangan. Fuqaroning mehnat staji kamida 7 yil bo‘lganda unga to‘liqsiz yoshga doir pensiya tayinlanadi.

Pensiya jamg‘armasi qonunchilikda ishsiz fuqarolar uchun pensiya tayinlash tartibi qanday bo‘lishi haqida ma’lumot berdi.

“Ishsiz fuqarolar O‘zbekiston Respublikasi Prezidentining 2020 yil 8 iyundagi “Tadbirkorlik faoliyati va o‘zini o‘zi band qilishni davlat tomonidan tartibga solishni soddalashtirish chora-tadbirlari to‘g‘risida”gi 4742-sonli qarorda belgilangan 78 turdagi mehnat faoliyati bilan shug‘ullansa hamda o‘rnatilgan tartibda o‘zini-o‘zi band qilgan shaxs sifatida ro‘yxatdan o‘tib, kamida bazaviy hisoblashning bir barobari (330 ming so‘m) miqdorida ijtimoiy soliq to‘lovini to‘lasa, 1 yil mehnat stajiga ega bo‘ladi”, deyiladi Pensiya jamg‘armasi xabarida.

Demak, ishsiz fuqaro 7 yil davomida har yili Pensiya jamg‘armasiga ijtimoiy soliq to‘lovini amalga oshirsa, pensiya olish huquqiga ega bo‘ladi.

 Hozirgi kunda, ish staji to‘liq bo‘lmagan chog‘dagi yoshga doir pensiyaning eng kam miqdori qo‘shimcha to‘lovni hisobga olgan holda – oyiga 535 ming so‘mni tashkil etadi. Pensiya miqdori ish haqi va ish stajiga bog‘liq. Agar fuqaro ijtimoiy soliqni qancha ko‘p to‘lasa, pensiya miqdori ham shuncha yuqori bo‘ladi.