O‘qituvchilarning ta’tili 56 kun etib belgilandi

Hukumat qarori bilan Pedagog xodimlar uchun yillik uzaytirilgan mehnat ta’tili davomiyligi me’yorlari tasdiqlandi. Unga ko‘ra, maktab o‘qituvchilarining mehnat ta’tili 56 kun deb belgilandi.

So‘nggi haftalarda maktab o‘qituvchilarining ta’tilini belgilashda muammo yuzaga kelayotgandi. Xususan, Kun.uz’ga murojaat qilgan o‘qituvchilar yozgi ta’tilda to‘lanadigan ta’til pullari kamayib ketgani borasida murojaat qilgandi.

Muammo tegishli vazirliklarning yangi Mehnat kodeksini amalga kiritish bilan bog‘liq normativ hujjatni qabul qilishni kechiktirgani bilan bog‘liq edi. Yangi Mehnat kodeksiga ko‘ra, yakshanba kuni ham ta’tilga qo‘shib hisoblanayotgani sababli (natijada yakshanba uchun ham haq to‘lanadi) o‘qituvchilarning ta’til kunlari va ularga to‘lanadigan pul miqdori kamayib ketgandi. Hukumat qarori bilan shu muammo bartaraf etilmoqda.

Yillik uzaytirilgan mehnat ta’tili uchun haq to‘lashda yakshanba va bayram kunlari inobatga olinmaydi, Bu maktab o‘qituvchilariga 56 kalendar kuni miqdorida mehnat ta’tili berilib, shundan 48 ish kuni uchun haq to‘lanishini anglatadi.

PS: Xabar tahrirlandi