Ekstraditsiyadan himoya: Belarus ukrainalik oligarx Firtashga diplomat maqomini berdi

Ukrainalik oligarx Dmitriy Firtash Belarusning Venada BMT tuzilmasidagi doimiy vakolatxonasi maslahatchisi maqomini oldi. Uning advokatlari biznesmenni AQShga ekstraditsiya qilish tartibini to‘xtatishni talab qilmoqda.

Foto: Getty Images

Korrupsiyada ayblanib AQShga ekstraditsiya qilinishi kutilayotgan ukrainalik tadbirkor Dmitriy Firtash diplomatik daxlsizlik so‘ramoqda. Bu haqda DW ixtiyorida bo‘lgan 14 iyundagi jinoyat ishlari bo‘yicha Vena Oliy sudi qarori matnida aytilgan.

Firtashning advokatlari ularning mijozi «Belarus Respublikasining xalqaro tashkilotlardagi doimiy vakolatxonasi maslahatchisi» maqomiga ega ekanligini ta’kidlamoqda, bu jinoiy ta’qibdan diplomatik immunitetni nazarda tutadi. Himoya dalillari 30 dan ortiq sahifada keltirilgan.

Dmitriy Firtash ishlaydigan «xalqaro tashkilot» UNIDO bo‘lib, BMT tuzilmasidagi unchalik taniqli bo‘lmagan xalqaro agentlik hisoblanadi, u mustamlakachilikdan keyingi uchinchi dunyo mamlakatlarini sanoatlashtirishga yordam beradi. UNIDO loyihalari, masalan, muzlatgichlar va konditsionerlar savdosi bilan shug‘ullanmoqchi bo‘lgan nigeriyalik ayollar uchun stipendiya dasturi - Venadagi shtab-kvartira tomonidan muvofiqlashtiriladi.

2021 yil 29 iyun kuni ukrainalik tadbirkor UNIDO vakili ekani haqidagi eslatma agentlik shtab-kvartirasiga berildi. Firtash ushbu tashkilot maslahatchisi sifatida diplomatik immunitetni nazarda tutuvchi diplomat maqomiga ega ekanligini isbotlash maqsadida tadbirkorning advokatlari 2021 yil oktyabr oyida G‘arbiy Yevropa professorlaridan biri tomonidan tayyorlangan yuridik ekspertizani sudga topshirgan.