«Chelsi», «Bavariya», «PSJ» va boshqa top-klublarni qaysi yulduzlar tark etdi va yana kimlar ketishi kutilmoqda.
Yevropa top-klublari transferlar bozoridagi ishlarni davom ettirmoqda. 2023 yil yozining alohidaligi shundaki, ma’lumotlarning ko‘pchiligi kuchli klublar safini futbolchilar oqimi tark etayotgani bilan bog‘liq. Bu boradagi eng faollik – «Chelsi»da kuzatilmoqda. Ammo londonliklar hali ham keraksiz futbolchilardan tarkibni tozalab ulgurmadi. «Chelsi», «Barsa», «MYu» va boshqa top-jamoalarni yana kimlar tark etadi?
«Chelsi»
London klubini allaqachon Kalidu Kulibali, Eduar Mendi (ikkisi ham «Al-Ahli»ga), N’Golo Kante («Al-Ittihod»), Temue Bakayoko (klubsiz), Joau Felish, Denis Zakariyo (ularning ikkisida ham ijara muddati tugadi), Kay Havers («Arsenal»), Mateo Kovachich («Manchester Siti»), Ruben Loftus-Chik («Milan»), Hakim Ziyosh («An-Nasr») tark etib bo‘lishdi. Ammo bu hali hammasi emas. Londonliklar yana bir guruh futbolchilari uchun variantlar izlamoqda: forvardlar Piyer-Emerik Obameyang (u «Barselona»ga qaytishi aytilmoqda), Romelu Lukaku («Inter» uning transfer huquqini sotib olishi, «Milan»ga o‘tishi yoki Saudiya Arabistoniga ketishi mumkin), Kristian Pulishich («Milan»), yarimhimoyachilar Meyson Maunt (asosiy variant – «Manchester Yunayted»), Kallum Hadson-Odoi (Saudiya Arabistonidan variantlar bor), shuningdek himoyachilar Sesar Aspilikueta va Trevo Chaloba (ularning ikkisini «Inter» bilan bog‘lashmoqda). «Chelsi»da tozalash davom etadi. Asosiy xaridlar esa hali oldinda – tarkibda joy bo‘shatilganidan keyin.
«Manchester Yunayted»
Mankunianliklar ham tarkibni ortiqcha futbolchilardan tozalash ustida ish olib bormoqda. Marsel Zabitser, Vaut Veghorst va Jyek Batlendning ijara muddati yakunlanib, o‘z klublariga qaytishdi. Shuningdek, «MYu»ni Aksel Tuanzebe va Fil Jons erkin agent maqomida tark etdi. Ammo asosiy chiqish transferlari hali oldinda. Daily Mail xabariga ko‘ra, «Yunayted» bir guruh futbolchilari bo‘yicha takliflarni kutmoqda. Ularning qatoriga: himoyachilar Aleks Telles, Harri Maguayr, Brendon Uilyams, Erik Bayi, yarimhimoyachilar Fred, Donni van de Bek, Skott Maktominey, Hannibal Mujbri va Jyeydon Sancho, shuningdek forvardlar Entoni Elanga va Antoni Marsiyal kiradi. Shuningdek, «MYu»ni erkin agent maqomida 12 yildan buyon klubda bo‘lgan David de Xea ham tark etishi mumkin. «Yunayted» sotuvlardan jami 280 mln yevro ishlab olishni ko‘zlagan. Yuqorida nomlari sanalgan futbolchilarning barchasini sotishning imkoni bo‘lishi dargumon, ammo ularning bir qismi Manchesterni tark etishi aniq.
«Liverpul»
Mersisaydliklar yoppasiga sotuvlarni amalga oshirmadi, ammo baribir klubni qator futbolchilar tark etishdi. Faxriy futbolchi Jyeyms Milner shartnomasi tugab, «Brayton»ga yo‘l oldi, Angliyada ishlari yurishmagan Nabi Keyta ham erkin agent maqomida Germaniyaga qaytdi, ammo «Leypsig»ga emas, «Verder»ga. Artur Meloning esa ijara muddati yakunlandi va «Yuventus» ixtiyoriga qaytdi. Shuningdek, shartnomasi yakunlangani tufayli Roberto Firmino va Aleks Oksleyd-Chemberleyn «Liverpul» bilan xayrlashdi. Yurgen Klopp jamoasini darvozabon Kivin Kelleher, markaziy himoyachilardan birortasi (Jozef Gomes, Ris Uilyams, Nataniyel Fillips) tark etishi kutilmoqda.
«Arsenal»
«Arsenal»ni tark etishi mumkin bo‘lgan futbolchilarning ko‘pchiligini ijaradan qaytganlar tashkil etadi. Ro‘yxatdan quyidagilar o‘rin olgan: darvozabon Aleks Runarsson, himoyachi Sedrik Suaresh, yarimhimoyachi Nikolya Pepe, shuningdek forvard Folarin Bolagun. «Kanonirlar» allaqachon Pablo Mari («Monsa» uning transfer huquqini sotib oldi) va Eynsli Meytlend-Nayls (erkin agent) tark etib bo‘ldi. Shuningdek, «Arsenal» himoyachi Kiran Tirni («Nyukasl») va yarimhimoyachi Tomas Parti (Saudiya Arabistoni klublari yoki «Yuventus») bilan xayrlashishi mumkin. Londonliklar tarkibda asosiy tozalashni o‘tgan yili o‘tkazishgandi, shuning uchun 2023 yil yozida jamoa bu borada mo‘’tadil siyosat yuritmoqda.
«Manchester Siti»
Angliyaning amaldagi chempioni, Angliya Kubogi va Chempionlar ligasi kubogi sohibi jamoada inqilob o‘tkazmoqchi emas. Himoyachi Benjamen Mendining shartnomasi muddati tugagan, ammo u o‘ziga qarshi ochilgan jinoiy ish tufayli anchadan buyon maydonga tushmayotgandi. Shuningdek, yarimhimoyachi Ilkay Gundo‘g‘an «Barsa»ga erkin agent sifatida yo‘l oldi. Yana bir ehtimoliy yo‘qotish – Bernardu Silva bo‘lishi mumkin. Portugaliyalik futbolchiga Saudiya Arabistoni klublari, «PSJ» va «Barselona» qiziqmoqda. Ammo Silva baribir Manchesterda qolishi haqiqatga yaqin variant.
«Barselona»
Kataloniyaliklarning yoz uchun asosiy vazifasi – maoshlar fondini qisqartirish. Ikki afsonaviy futbolchi – Serxio Buskets (yillik maoshi 24 mln yevro) va Jordi Alba (10,5 mln yevro) erkin agent maqomida ketishi «Barsa» iqtisodiga foyda keltirdi. Shuningdek, ko‘k-anorranglilar ijaradan qaytgan himoyachilari Serjino Dest, Sameul Umtiti va Kleman Langle uchun yangi klub qidirmoqda. «Barsa» chempionlik tarkibidagi bir necha futbolchini sotuvga qo‘yishni ham ko‘zlagan. Xususan, Xavi himoyachi Erik Garsiya («Inter»), yarimhimoyachi Frank Kessiye («Al Ahli») va vinger Ansu Fati («Vulverhempton»). «Barselona» bir shov-shuvli transferni amalga oshirib bo‘ldi – germaniyalik yarimhimoyachi Ilkay Gundo‘g‘an erkin agent maqomida keldi. Navbatdagi yangilar kelishi chiqish transferlari kampaniyasi muvaffaqiyatiga bog‘liq.
«Yuventus»
Turinliklar so‘nggi o‘n yillikdagi eng yomon mavsumini o‘tkazdi. Jamoa faqat Konferensiyalar ligasiga yo‘llana ololdi (bunga iqtisodiy firibgarliklar uchun ochkolar olib tashlanishi bilan bog‘liq mojaro sabab bo‘ldi), shuningdek mavsum birorta sovrinsiz yakunlandi. Turinliklar qayta qurish davriga kirmoqda. Klubni allaqachon Anxel Di Mariya va Deyan Kulushevski (bir yarim mavsumlik ijaradan keyin «Tottenhem» uni sotib oldi) tark etdi. Shuningdek «Yuve»ni tark etishi kutilayotganlar qatorida Dushan Vlahovich («PSJ», «Nyukasl», «Chelsi» va «Bavariya» qiziqmoqda), Federiko Kiyeza («Liverpul», «Chelsi», «PSJ», «Bavariya»), Bremer («Tottenhem», «Aston Villa») va Xuan Kuadrado (uning shartnomasi tugamoqda, ammo hali uzaytirilishi ham mumkin) kabilar bor.
«Bavariya»
Myunxenliklar o‘tgan mavsumni ancha yomon yakunlanganiga qaramay (YeChLdan erta chiqib ketildi, Germaniya Kubogi finaligacha ham yetib borilmadi, chempionlik faqat «Borussiya»ning so‘nggi turdagi qoqilishi tufayli qo‘lga kiritildi), jamoa jiddiy o‘zgartirishlar rejalashtirmayapti. «Bavariya»ni ikki fransuz himoyachisi tark etishi mumkin: Benjamen Pavar va Lukas Ernandes. Ularning birinchisiga «PSJ», ikkinchisiga – «Chelsi», «Liverpul», «Barsa», «Inter», «Real» da’vogar. «Liverpul» «Bavariya» yarimhimoyachisi Rayan Gravenberhni qo‘lga kiritish haqida ham o‘ylamoqda. Ketish uchun nomzodlardan yana biri – vinger Sadio Mane. Senegallik futbolchi Myunxenda kutilgan o‘yinni namoyish eta olmadi, qolaversa sobiq bosh murabbiy Yulian Nagelsman va jamoadoshi Leroy Sane bilan janjallashdi.
«PSJ»
Parijliklar klubi asosiy yulduzlaridan biri – Lionel Messini yo‘qotdi. Shuningdek, jamoani katta ehtimol bilan Kilian Mbappe ham tark etadi. Bu qachon – shu yozda yoki keyingi yil ro‘y berishi – hozircha noma’lum. Forvard Madridning «Real» klubiga borib qo‘shiladi. «PSJ»dan Neymar ketishi varianti ham istisno etilmaydi. Braziliyalik uchun da’vogarlar qatorida «Chelsi» va Saudiya Arabistoni klublari bor. Shuningdek, italiyalik yarimhimoyachi Marko Verrattining kelajagi muhokama qilinmoqda. Masalan, unga «Roma» da’vogar. Rimliklar klubi bosh murabbiyi Joze Mourino shaxsan Markoga qo‘ng‘iroq qilgan va uni Rimga kelishga undagan. Shuningdek, parijliklar ijaradan qaytgan futbolchilaridan qutulishga harakat qiladi. Forvard Mauro Ikardi «Milan»ga, yarimhimoyachi Leandro Paredes – «Galatasaroy»ga yo‘l olishi mumkin.
«Real»
Madrid superklubi futbolchilar ketishi kampaniyasini yakunlagan. «Real»ni Marko Asensio, Eden Azar va Mariano Dias (barchasi – erkin agent maqomida) tark etdi, shuningdek Karim Benzema Saudiya Arabistoniga («Al-Ittihod») yo‘l oldi. Klub Dani Sebalyos, Toni Kroos, Luka Modrich va Nacho Fernandes bilan shartnomalarni yangiladi. Shunday ekan, «Real»ni yana kimdir tark etishi dargumon.
«Napoli»
Italiyaning amaldagi chempionlari hozircha asosiy futbolchilarini yo‘qotgani yo‘q. Ammo forvard Viktor Osimhen va himoyachi Kim Min Je katta ehtimol bilan shu yozda klubini o‘zgartiradi. Ularning ikkisiga ham top-klublar da’vogarlik qilmoqda. Osimhenni «Chelsi» va «PSJ» bilan, Kimni – «Bavariya» va «MYu» bilan bog‘lashmoqda. Neapolitanliklar klubini, Luchano Spallettidan tashqari, Andrea Petanya («Monsa»), Sebastiyano Luperto («Empoli») tark etdi, shuningdek Tangay N'Dombele, Bartosh Bereshinski va Piyerluidji Gollini ijaradan qaytdi.
