Lukashenko Prigojin qayerda ekanini aytdi

«Vagner» asoschisi Yevgeniy Prigojin hozirda Belarus hududida emas. Bu haqda Aleksandr Lukashenko xorijiy jurnalistlar bilan o‘tkazilgan matbuot anjumanida aytdi.

«Vagner» asoschisi Yevgeniy Prigojin 23 iyun kuni amalga oshirilgan harbiy isyondan keyin aynan Lukashenko bilan muzokara o‘tkazgan va qo‘shinlarini ortga qaytargandi. O‘sha muzokaralardan keyin Rossiya hukumati Prigojin ustidan ochilgan jinoiy ishni bekor qilgan va unga o‘z armiyasi bilan birga Belarusga ketishga imkon berilgandi.

Jurnalistlar Lukashenkodan «Vagner» jangchilari hozir qayerda joylashgani haqida so‘rashdi. Ammo Lukashenko vagnerchilar mamlakat hududida bor yoki yo‘qligiga oydinlik kiritmadi.

«Men juda jiddiy jangchilar deb hisoblaydigan «Vagner» xususiy harbiy kompaniyasi jangchilari hozir o‘z lagerlarida. Ya’ni, frontdan chiqarilganidan keyin yuborilgan doimiy lagerlarida. Ular davolanish, tiklanish va rotatsiya kabi bunday urushlar uchun tabiiy jarayonlarni amalga oshirishmoqda.

Baxmut [uchun janglar]dan keyin ular o‘sha lagerga yuborilgan va hozir ham o‘sha yerda. Prigojin esa Peterburgda. Balki bugun tongda u Moskvaga borgandir, balki yana boshqa joyga. Ammo u hozirda Belarus hududida emas», degan Lukashenko Prigojin haqida.

OAVdagi xabarlarga ko‘ra, «Vagner» bo‘linmalari olib ketilgan lager Mogilev oblasti hududida joylashgan.