Kasanachilarga ipak qurti bilan bog‘liq resurslarni pillachilik klasterlari bepul beradi

Kasanachilar, pillachilik uy xo‘jaliklari hamda fermer xo‘jaliklariga ipak qurti urug‘i va uni parvarish bilan bog‘liq resurslar, jumladan to‘shama qog‘oz, termometr, polietilen plyonka, psixrometr (inkubatoriyalar uchun) va boshqa zaruriy resurslar pillachilik klasterlari tomonidan bepul beriladi.

Foto: Kun.uz

“Pillachilik sohasida kasanachilikni qo‘llab-quvvatlash hamda pilla yetishtirish uchun ozuqa bazasini yanada kengaytirishning qo‘shimcha chora-tadbirlari to‘g‘risida”gi prezident farmoniga ko‘ra, maydoni 10 gektar va undan ziyod gektardagi tutzorlarga suv chiqarish uchun burg‘ilangan quduq, shuningdek, daryolar, kanallar hamda boshqa suv havzalaridan suv tortish uchun nasos stansiyasini qurishga har bir metri uchun 600 ming so‘mdan, ammo 120 million so‘mdan oshmaydigan miqdorda subsidiya ajratiladi.

Qishloq xo‘jaligi vazirligi, Ipakchilik va jun sanoatini rivojlantirish qo‘mitasi 2023-2024 yillarda Osiyo taraqqiyot bankidan 10 mln AQSh dollari miqdoridagi imtiyozli kredit mablag‘larini tut yetishtirish, pillani qabul qilish, saralash, saqlash va qayta ishlash kompleksini qurishga jalb etish choralarini ko‘radi.

Qishloq xo‘jaligi vazirligi, Qo‘mita va «O‘zbekipaksanoat» uyushmasining takliflariga asosan, hududiy «Agropilla» mas’uliyati cheklangan jamiyatlariga tegishli bo‘lgan va aholiga oilaviy pudrat shartnomasi asosida biriktiriladigan tutzorlar maydoni 0,5 gektardan 2 gektargacha etib belgilandi.

Bunda:

qo‘mita va «O‘zbekipaksanoat» uyushmasi eskirgan tutzorlarni ularni rekonstruksiya qilish sharti bilan pillachilik uy xo‘jaliklariga biriktiradi;
tutzorlarni belgilangan o‘lchamlarda pillachilik uy xo‘jaliklariga biriktirish aholi bilan oldin tuzilgan oilaviy pudrat shartnomalari muddatlari tugagandan so‘ng amalga oshiriladi;
pillachilik uy xo‘jaliklarining faoliyati pillachilik klasterlari bilan kooperatsiya asosida yo‘lga qo‘yiladi;
pillachilik uy xo‘jaliklariga biriktirilgan yer maydonining tut qatorlari orasiga sabzavot, kartoshka, poliz ekinlari, gul, ko‘katlar va dorivor o‘simliklar, makkajo‘xori doni, dukkakli va moyli ekinlarni ekishga ruxsat beriladi;
Kambag‘allikni qisqartirish va bandlik vazirligi huzuridagi Mahallabay ishlash va tadbirkorlikni rivojlantirish agentligi hamda tuman (shahar) hokimlarining yordamchilari oilaviy pudrat shartnomasi shartlari asosida pillachilik uy xo‘jaliklari faoliyatini yo‘lga qo‘yib, aholi bandligini ta’minlashga shaxsan mas’ul hisoblanadi.

#kasanachi #pillachilik