Davlat raqami Toshkent shahridagi ustaxonalarning biridan o‘g‘irlangan va qariyb bir yil davomida beshta turli mashinaga taqib kelingan.
Jizzaxda o‘g‘irlangan davlat raqamini taqib olgan, noqonuniy tarzda migalka va sirena yoqib harakatlanayotgan haydovchi qo‘lga olingan.
Jizzax viloyati IIB YHXB axborot xizmatining Kun.uz’ga xabar berishicha, 2023 yil 11 iyul kuni M-39 Toshkent-Termiz xalqaro yo‘lining Jizzax viloyati G‘allaorol tumanidan o‘tgan qismida migalka va sirenani yoqib kelayotgan Malibu-2 mashinasi viloyat IIB YHXB xodimlarida shubha uyg‘otgan.
Malibu-2 inspektorlar tomonidan to‘xtatilib, tekshirib ko‘rilganda unga taqilgan 01 015 QFA davlat raqami mazkur mashinaga tegishli emasligi aniqlangan. Mashina yukxonasidan yana bir juft davlat raqamlari topilgan.
Bundan tashqari, mashinaning old oynasi noqonuniy ravishda qoraytirilib olingani aniqlangan. Shundan so‘ng haydovchiga nisbatan ma’muriy bayonnoma rasmiylashtirilib, mashina jarima maydonchasiga joylashtirilgan.
Dastlabki surishtiruvlarga ko‘ra, mashinadagi davlat raqami 2022 yil 4 avgust kuni Toshkent shahri Sergeli tumanida joylashgan ustaxonalarning biridan o‘g‘irlab ketilgani ma’lum bo‘lgan.
O‘g‘irlangan davlat raqami Toshkent shahrida yashovchi fuqaroning Nexia mashinasiga tegishli ekani oydinlashgan.
Ma’lum bo‘lishicha, o‘g‘irlangan davlat raqami qariyb bir yil davomida Toyota Prado, Tricker, Malibu-2, Lacetti va Nexia-3 mashinalariga taqilgan va 2022 yil 4 avgustdan 2023 yil 11 iyulga qadar ular tomonidan 292 marta tezlik qoidalari buzilgan.
Qayd etilishicha, hozirda holat yuzasidan surishtiruv ishlari davom etmoqda.
