Arestovich Ukrainaning GFR - GDR tamoyiliga ko‘ra bo‘linishi mumkinligini istisno etmadi

Ukrainaning Kiyev nazoratidagi qismi NATOga qo‘shilishi mamlakat prezidenti devonining sobiq maslahatchisi Oleksiy Arestovich tomonidan «juda yaxshi kelishuv» deb baholandi.

Foto: Office of the President of Ukraine

Kiyev tomonidan nazorat qilinadigan Ukraina hududining NATOga qo‘shilishi va mamlakatning Rossiya egallab olgan qismiga alyans kafolatlari tegishli bo‘lmasligi Ukraina uchun «supertarixiy imkoniyat» bo‘ladi. Bu fikrni Ukraina prezidenti devoni sobiq maslahatchisi Oleksiy Arestovich jurnalist Yuliya Latininaning YouTube’dagi efirida bildirdi. Ukraina va Rossiya matbuoti 16 iyul, yakshanba kuni ushbu bayonotga e’tibor qaratdi.

«Ba’zi ishg‘ol qilingan hududlar Ukraina hukumati nazoratidan tashqarida qolmoqda. Aytaylik, 80 foizi (...) Aslida, biz, davlatning aksariyat qismi uchun urushni to‘xtatib, NATOga a’zo bo‘lamiz. Ko‘pchilik buni o‘ta tarixiy imkoniyat deb aytishi mumkin», dedi Arestovich.

Shu bilan birga, u ayrim tahlilchilarning Ukrainaga Qrim va boshqa hududlarni ozod etishdan bosh tortishni hech kim taklif qilmayotgani haqidagi fikrlarini esga oldi: «Ular shunchaki istiqbol yo‘qligi sababli buni harbiy yo‘l bilan qilmaslikni taklif etmoqda. Yoki buni 200 ming erkak aholisi, genofondi, vayron bo‘lgan iqtisodiyoti va boshqa narsani yo‘q qilish orqali harbiy yo‘l bilan amalga oshirsa bo‘ladi».

Arestovichning so‘zlariga ko‘ra, birinchi ssenariy «GFR-GDR varianti»ni eslatadi: «GFR NATOga qo‘shiladi, GDR Germaniya hududi sifatida tan olingan, lekin NATO kafolatlari unga taalluqli emas». «Aslida, bu juda yaxshi kelishuv. Qaysidir darajada axloqsiz, lekin juda yaxshi», - dedi Yuliya Latininaning suhbatdoshi.