AQSh Abrams tanklarining birinchi partiyasini Kiyevga yetkazib berishni ma’qulladi

Qo‘shma Shtatlarda Abrams tanklarining birinchi partiyasini Kiyevga topshirish bo‘yicha qaror qabul qilindi. «AQSh tomonidan Ukrainaga yetkazib berilayotgan Abrams tanklarining birinchi partiyasi dam olish kunlari (5 va 6 avgust) jo‘natish uchun ma’qullandi, tanklar Ukrainaga kuz boshida yetib borishi kerak», — deya CNN armiya ta’minot bo‘limi rahbari Duglas Bushning so‘zlaridan iqtibos keltiradi.

«Ular (tanklar) tayyor, - dedi Bush brifingda jurnalistlar bilan suhbatda. - Endi ular Yevropaga, keyin esa Ukrainaga, barcha hamrohlik qiluvchi elementlar bilan birga borishi kerak. O‘q-dorilar, ehtiyot qismlar, yonilg‘i quyish jihozlari, ta’mirlash qurilmalari. Gap faqat tanklar haqida emas, balki ular bilan birga keladigan narsalarning to‘liq to‘plami haqida ketyapti».

May oyining oxiri - iyun oyining boshlarida amerikalik instruktorlar UQK harbiylarini Germaniyadagi Grafenvyor poligonida Abrams tanklarini boshqarishga o‘rgatishni boshladi.

Ukrainaga mo‘ljallangan 31 ta tank bir necha oy davomida ta’mirlanib, jo‘natishga tayyorlanayotgan edi, yetkazib berishni boshlash uchun ruxsatnoma hafta oxiri, 5 va 6 avgust kunlari olingan, deya tushuntiradi CNN. Ayni paytda, Duglas Bush birinchi partiyaga qancha tank kiritilishiga aniqlik kiritmadi. 27 iyul kuni Politico internet nashri sentabr oyida Ukrainada bo‘lishi mumkin bo‘lgan 6-8 ta mashina haqida gap ketayotgan bo‘lishi mumkinligini yozdi.