Pokrovsk o‘qqa tutildi, okkupatsiya ostidagi Berdyansk saylovlarga tayyorlanmoqda. Urush suratlari

Ukrainada urushning 530-kuni o‘tdi. Asosiy ma’lumotlar:

• Rossiya qo‘shini Donetsk oblastining Pokrovsk shahri bo‘ylab raketa zarbasi yo‘lladi. Ukraina IIVning so‘nggi ma’lumotlariga ko‘ra, yetti kishi halok bo‘lib, 81 kishi yaralangan. Qurbonlar orasida — Favqulodda vaziyatlar davlat xizmatining Donetsk oblasti bo‘yicha o‘rinbosari, 52 yoshli Andrey Omelchenko ham bo‘lgan.
• Rossiya TIV Volodimir Zelenskiyning «tinchlik formulasi»ni rad etib, uni «Rossiyaga ma’nosiz ultimatum» deb atadi. Ukraina prezidenti tomonidan taqdim etilgan formula Rossiya qo‘shinini olib chiqish va harbiy harakatlarni to‘xtatish, mamlakat hududiy yaxlitligini tiklash, barcha asirlar va deportatsiya qilinganlarni ozod etish, tajovuz aybdorlari uchun tribunal va yetkazilgan zarar uchun tovon puli, shuningdek Ukraina uchun xavfsizlik kafolatini ko‘zda tutadi.
• 7 avgustga o‘tar kechasi rossiyalik harbiylar Xersonni uch bor o‘qqa tutdi. Bir kishi halok bo‘lib, kamida yetti kishi yaralangan.
• Kaluga oblastida dron urib tushirildi. Samolyot tipidagi yana bir dron Belgorodga kirish chog‘ida bartaraf etilgan. Ikki regionda ham jabrlanganlar va vayrongarchiliklar qayd etilmagan.
• Rossiyaning Ukrainaga bosqini boshlanganidan buyon 763 ta madaniy meros obekti shikastlangan yoki yo‘q qilingan, deya xabar berdi Ukraina madaniyat vazirligi.
• Vladimir Putin «Rostex» rahbariga «Kub» va «Lanset» kamikadze dronlari ishlab chiqarish hajmini oshirish bo‘yicha topshiriq berdi.
• Ukraina 22 nafar harbiy xizmatchisini asirlikdan qaytardi. Almashuv shartlari va boshqa tafsilotlar ochiqlanmagan.

Pokrovsk bo‘ylab zarba

7 avgust kuni kechqurun Rossiya qo‘shini Donetsk oblastida, front chizig‘idan 40 kilometr masofada joylashgan Pokrovsk shahrini o‘qqa tutdi. Oblast ma’muriyati rahbari Pavel Kirilenkoga ko‘ra, hujum vaqtida turar joylar, mehmonxona, do‘konlar va ma’muriy binolar shikastlangan. Ukraina IIV xabariga ko‘ra, 7 kishi halok bo‘lib, 81 kishi yaralangan, qurbonlardan biri — Favqulodda vaziyatlar davlat xizmatining Donetsk oblasti bo‘yicha o‘rinbosari Andrey Omelchenko. RF mudofaa vazirligi bu zarbalar yuzasidan izoh bermadi.

Donbassdagi ukrain artilleriyachilari

Okkupatsiya qilingan Berdyanskda «Yedinaya Rossiya» partiyasi tashviqoti

Berdyansk — Zaporijjya oblasti janubida, Ukraina nazoratida qolgan oblast markazidan taxminan 200 kilometr janubi-sharqda joylashgan shahar. Rossiya qo‘shini Berdyanskni 2022 yil 28 fevralida okkupatsiya qilgan.

Rossiyada va Ukrainaning RF armiyasi tomonidan ishg‘ol etilgan hududlarida sentabr oyida bo‘lib o‘tadigan hududiy va munitsipal saylovlar oldidan, «Yedinaya Rossiya» partiyasi Berdyansk ko‘chalarida tashviqot bannerlarini ilib tashlagan.