Usmon Dembele – «PSJ» futbolchisi

«PSJ» klubi rasmiy sayti fransiyalik hujumkor yarimhimoyachining transferini e’lon qildi. Dembele «PSJ» klubi bilan 2028 yilgacha mo‘ljallangan 5 yillik shartnoma imzoladi. Parij klubi 26 yoshli vingerning transferi uchun «Barselona»ga 50 million yevro to‘laydi. Bu Dembelening Kataloniya klubini tark etish uchun shartnomadagi tovon puli hisoblanadi. Kelishuv shartlariga binoan, mablag‘ning teng yarmi futbolchining hisob raqamiga o‘tkazilishi belgilangan.

Ma’lumot uchun, 26 yoshli vinger 2016 yil Fransiyaning «Renn» klubidan «Borussiya»ga o‘tgan, Dortmund klubidan esa 2017 yilda 105 million yevro evaziga «Barselona»ga transfer qilingandi. Dembele Kataloniya klubida o‘tgan mavsum La Ligada 25 o‘yinda 5ta gol va 7ta assist qayd etib, yakunda Ispaniya chempioniga aylangan edi.