Neymar ketdi, Mbappe qaytdi. So‘nggi transfer xabarlari 

Neymar ham Saudiya klubiga o‘tmoqda

Bugungi kunda transferlar dayjestini Saudiya Arabistoni ishtirokisiz tasavvur qilib bo‘lmaydi. Bu safar esa Yaqin Sharq bilan bog‘liq bir necha yangiliklar bor. Xususan, Neymarning «Al-Hilol»ga transferi masalasi hal bo‘ldi. Fabritsio Romano mashhur iborasi orqali tasdiqladi — here we go!

Neymar shanba kuni «PSJ»ning «Loryan»ga qarshi uchrashuvi qaydnomasiga ham kiritilmagandi.

Yakshanba kuni RMC Sport nashri «PSJ» saudiyaliklarning 31 yoshli braziliyalik transferi bo‘yicha taklifini qabul qilganini xabar qildi. Unda gap 90 million yevro haqida borayotgani, bonuslar hisobiga bu summa 120 million yevroga yetishi mumkinligi aytilgandi. Romano esa parijliklarga transfer uchun 100 million yevro to‘lanishini bildirdi.

L’Équipe xabariga ko‘ra, futbolchi va «Al-Hilol» rahbariyati ikki yillik shartnoma bo‘yicha kelishuvga erishgan. Unga ko‘ra, Neymar yangi klubida ikki mavsum uchun 160 million yevro ishlab oladi.

Neymar o‘tgan mavsum Fransiya chempionatida 20 o‘yinda 13 ta gol urgan va 11 ta assist muallifi bo‘lgan. U Parij klubiga 2017 yil rekord darajadagi 222 mln yevro evaziga «Barselona»dan kelib qo‘shilgandi.

Futbolchi bugunning o‘zida yangi jamoasi uchun tibbiy ko‘rikdan o‘tadi. 

Avvalroq Neymar «Barselona»ga qaytishi mumkinligi haqida xabarlar tarqalgandi, ammo kataloniyaliklar klubi hozirgi holatida bunday transfer amalga oshira olmasdi.

Mbappe «PSJ»ning asosiy tarkibiga qaytdi, u bilan shartnoma uzaytiriladi

Yozgi transferlar oynasining asosiy dostoni Kilian Mbappe atrofida kechmoqda. Uch hafta oldin «PSJ» yulduzli futbolchisini tarkibdan chetlatgandi, endi esa, Fransiya chempionati 1-turida «Loryan»ga qarshi golsiz durangdan keyin forvardni tarkibga qaytarishdi.

The Athletic xabariga ko‘ra, parijliklar klubi Mbappe bilan shartnomani uzaytirishga umid qilmoqda, L’Équipe ma’lumotiga ko‘ra, futbolchi tekinga ketmaslikka va’da bergan.

Klub futbolchi bilan «samarali va ijobiy ruhdagi muzokaralar» bo‘lib o‘tganini ma’lum qildi.

Jurnalist Abdel Bulmaning xabariga ko‘ra, Mbappe endi «PSJ» bilan shartnomani 2025 yil yoziga qadar uzaytirishga rozi. Futbolchining buning uchun keyingi yil yozida «Real»ga transferi kafolatlanishini talab qilmoqda.

«PSJ» Mbappeni o‘zining yangi loyihasida ham markaziy figura sifatida ko‘rmoqda. Klub bungacha vinger Usmon Dembele va hujumga faol qo‘shiluvchi qanot himoyachisi Lyuk Ernandesni, shuningdek portugaliyalik hujumchi Gonsalu Ramushni tarkibiga qo‘shib olgandi. Parijliklar Fransiya milliy jamoasi hujumchisi Randal Kolo-Muani bilan ham faol muzokara olib bormoqda.

Mbappe avvalroq rahbariyatdan yulduzli futbolchilar transferini talab qilgandi. Le Parisien xabariga ko‘ra, fransuz yangi transferlardan xursand va unga «PSJ» rahbarlarining harakatlari ma’qul kelmoqda.

«Chelsi» Kaysedoni «Liverpul»dan ilib ketdi

«Chelsi» yaqin vaqtlar ichida APL tarixidagi eng qimmatbaho transferni e’lon qilishi kutilmoqda, klub «Brayton» havbeki Moyses Kaysedo uchun 115 million funt to‘lashga rozi. Bu ma’lumotni Fabritsio Romano tasdiqlagan.

Klublar kelishuvga erishishga yaqin.

Avvalroq The Athletic Kaysedo juma kuni «Liverpul» uchun tibbiy ko‘rikdan o‘tgani, mersisaydliklar 110 million funt (133 million yevro) taklif qilgani haqida xabar bergandi. 21 yoshli ekvador kelayotganini APL 1-turi arafasida jurnalistlar bilan muloqot qilgan Yurgen Klopp ham tasdiqlagandi.

Ammo «Chelsi» «Liverpul»nikidan kattaroq taklif berdi va futbolchining o‘zini ham ko‘ndirdi. Romanoning xabariga ko‘ra, Kaysedo o‘z klubi rahbarlariga aynan London klubiga o‘tishni istayotganini bildirgan. Natijada «Liverpul» muzokaralardan chiqqan.

Liverpool Echo nashri esa «Chelsi» ushbu tayanch yarimhimoyachisi uchun shuncha mablag‘ to‘lasa, moliyaviy feyr-pley qoidalarini buzgani uchun UYeFA sanksiyalariga uchrashi mumkinligini yozgan.

Ayrim tafsilotlar ham «Chelsi» uchun xavf mavjudligini ko‘rsatadi, klub «Brayton»ga transfer doirasida o‘zining bir necha futbolchilarini berishni taklif qilgan, ammo bunday shart bo‘yicha kelishuvga erishish imkoni bo‘lmagan. «Brayton» Kaysedo uchun faqat pul olmoqchi va bu pullar birdaniga to‘liq to‘lab berilishini talab qilmoqda.

«Barselona» Feliks bilan shartnoma tuzishga harakat qiladi

Usmon Dembeleni «PSJ»ga qo‘yib yuborgan, uning o‘rniga kelishi kutilgan Neymar esa «Al-Hilol»ga ketayotgani tufayli «Barselona» hujum chizig‘ini kuchaytirish uchun e’tiborini boshqa transfer nishoniga qaratdi. Insayder Fabritsio Romanoga ko‘ra, kataloniyaliklar Madridning «Atletiko» klubi bilan hujumchi Joau Feliks bo‘yicha muzokaralarni qayta tiklagan.

«Barsa» avvalroq Neymar variantini ko‘rib chiqayotgandi, ammo braziliyalik hujumchi Saudiya Arabistoni klubini tanladi. Feliks esa iyul oyida «Barselona»ga o‘tish niyatini bildirgandi: «Men buni bolaligimdan orzu qilaman», — degandi 23 yoshli portugaliyalik.

Avgust oyi boshida ispan nashrlari «Barselona» murabbiyi Xavi Feliks nomzodiga qarshi ekanini yozib chiqqandi. Ammo rahbariyat baribir ushbu futbolchini olib kelish variantini o‘rganmoqda. Klub uni faqat ijaraga olishi mumkin, chunki kataloniyaliklarda to‘laqonli transfer uchun mablag‘ yo‘q.

Manchini kutilmaganda Italiya milliy jamoasini tark etdi

Italiya milliy jamoasi bosh murabbiyi Roberto Manchini Yevro-2024 startiga 10 oy vaqt qolganida lavozimini tark etdi. Bu milliy jamoa natijalari bilan aloqador emas.

Italiyalik jurnalist Nikolo Shiraning xabariga ko‘ra, u Saudiya Arabistoni milliy jamoasi boshqaruviga kelishi mumkin. La Gazzetta dello Sport xabariga ko‘ra, unga saudiyaliklar yiliga 40 mln yevrolik maosh taklif qilishgan.

O‘z navbatida, Italiya milliy jamoasi boshqaruviga o‘tgan mavsum yakunida «Napoli»dan ketgan Luchano Spalletti asosiy nomzod bo‘lib turibdi.

«Tottenhem» Lukakuni olmoqchi

«Chelsi» Lukakudan qutula olmayapti, futbolchi esa jamoa mashg‘ulotlarida ham ishtirok etmayapti. Avvaliga «Inter» bilan muzokaralar boshi berk ko‘chaga kirib qolgandi, keyin esa «Yuventus» bilan ham kelishishning imkoni bo‘lmadi. Qolaversa, Turindagi fanatlar bunday transferga keskin qarshi chiqishdi. Endi esa shu kunlarda Harri Keynni «Bavariya»ga sotgan «Tottenhem» ushbu futbolchi bo‘yicha «Chelsi»ga aloqaga chiqqan.

Rasman e’lon qilingan transferlar

Kepa «Bavariya» o‘rniga «Real»ni tanladi

«Real» «Chelsi» darvozaboni Kepa Arrisabalaga transferini e’lon qildi. Ispaniyalik darvozabon o‘tgan haftada tizzasidan jiddiy jarohat olib, deyarli mavsum oxiriga qadar safdan chiqqan Tibo Kurtua o‘rniga taklif etilgan.

«Real» Kepani sotib olish shartisiz bir yilga ijaraga olgan.

Bir kun oldin «Bavariya» bosh direktori Yan-Kristian Drizen Kepa Madrid klubiga o‘tish uchun myunxenliklar taklifini rad etganini aytgandi. U «Chelsi»ning «Liverpul»ga qarshi APL 1-tur o‘yiniga zayavka qilinmagandi.

Under «Fenerbahche»ga o‘tdi

Turkiyalik vinger Dengiz Under «Marsel»dan «Fenerbahche»ga o‘tdi. 26 yoshli futbolchi yangi klubi bilan 4 yillik shartnoma imzolagan. Transfermarkt ma’lumotiga ko‘ra, transfer summasi 15 million yevroni tashkil etgan.

Avvalroq ushbu futbolchiga «Zenit» qiziqish bildirayotgani aytilgandi, peterburgliklar «Al-Hilol»ga sotilgan Malkom o‘rniga futbolchi qidirmoqda.

Adama Traore «Fulhem»ga o‘tdi

Bir necha yil oldin Traore APL himoyachilarining dahshatli tushiga aylangan va o‘zi tarbiyalangan «Barselona» nazariga tushib, u yerda bir yil ijara asosida o‘ynab kelgandi. Endi esa u o‘rtamiyona «Fulhem» safida o‘ynaydi. 27 yoshli universal qanot futbolchisi «Vulverhempton»ni erkin agent maqomida tark etib, London klubiga yo‘l oldi. Futbolchi bilan ikki yillik shartnoma tuzilgan, kelishuvga ko‘ra shartnoma muddati yana bir yilga uzaytirilishi mumkin.

Diyego Kosta o‘ziga yangi klub topdi

34 yoshli hujumchi Diyego Kosta yana Braziliyaga qaytdi. U o‘z faoliyatini o‘smirlar darajasida shu yerda boshlagan, 2020 yilda «Atletiko»dan ketganidan keyin ham vataniga qaytib, «Atletiko Mineyro»da bir mavsum o‘ynagandi. «Vulverhempton»da ishlari yurishmagan tajribali futbolchi endi «Botafogo»da o‘ynaydi. U bilan 2023 yil oxiriga qadar shartnoma tuzilgan.

Chemberlen – «Beshiktosh» futbolchisi

Aleks Oksleyd-Chemberlen Turkiya chempionatiga ko‘chib o‘tdi. Angliyalik 29 yoshli futbolchi «Beshiktosh» klubi bilan 2026 yil yoziga qadar shartnoma imzoladi. U «Liverpul»dagi 6 yillik faoliyatidan keyin o‘tgan mavsum oxirida erkin agentga aylangandi.

Oksleyd-Chemberlen faoliyati davomida «Sauthempton» va «Arsenal» klublarida ham to‘p surgan. U o‘tgan mavsum liverpulliklar safida APLda 9 o‘yinda bitta golga mualliflik qilgandi.

Transferlar bozorida yana nima gaplar?

«PSJ» yana bir hujumchi olmoqchi

Parijliklar klubi hujum chizig‘i uchun allaqachon Dembele va Ramushni transfer qilgan, endi esa yana bir hujumchi bo‘yicha kelishuvga erishmoqchi. Gap Bundesligada o‘tgan mavsumning eng yorqin futbolchilaridan biri – «Ayntraxt» forvardi Kolo Muani haqida bormoqda. Jurnalist Florian Plettenbergga ko‘ra, fransuz bilan allaqachon shaxsiy shartnoma bo‘yicha kelishuvga erishgan, nemislar klubi esa bonuslardan tashqari 100 mln yevro olishni istamoqda.

Maguayr baribir «Vest Hem»ga o‘tadi

«Manchester Yunayted» himoyachisi Harri Maguayr faoliyatini «Vest Hem»da davom ettiradi. Fabritsio Romano ma’lumotiga ko‘ra, klublar 2019 yilda dunyoning eng qimmatbaho himoyachisi bo‘lgan futbolchini 35 mln yevroga transfer qilish bo‘yicha kelishuvga erishgan. Shu manbaning o‘zi «MYu» endi uch himoyachi –  Benjamen Pavar («Bavariya»), Jan-Kler Todibo («Nitssa») va Edmon Tapsobe («Bayyer») variantini ko‘rib chiqayotganini aytgan.

Pavar «MYu»ga o‘tishni istamoqda

«Bavariya» va Fransiya milliy jamoasi himoyachisi Benjamen Pavar «Manchester Yunayted»ga o‘tishni istamoqda, deb xabar berdi Sky Spors muxbiri Kaveh Solekol. 27 yoshli fransuz ingliz klubiga o‘tishi uchun o‘ziga bog‘liq barcha ishni qilishga tayyor.

Jurnalist Florian Plettenbergga ko‘ra, «MYu»ning shu kunlarda Pavar bo‘yicha yuborgan ilk taklifi «Bavariya» tomonidan rad etilgan. Avvalroq Angliya klubi fransuz uchun 30 million yevro to‘lashga tayyorligi xabar qilingandi.

L'Equipe ma’lumotiga ko‘ra, Pavar — «Manchester Yunayted» bosh murabbiyi Erik ten Hag uchun Harri Maguayr o‘rniga ustuvor variant sifatida ko‘rilmoqda.

«Al-Ahli» Zelinski bilan muzokara o‘tkazmoqda

«Napoli» yarimhimoyachisi Petr Zelinski Saudiya Arabistoni chempionatiga o‘tishi masalasi bir necha oydan buyon muhokama etilmoqda. Avvaliga uning «Al-Hilol»ga transferi haqida gap ketgandi, endi esa asosiy futbol insayderi Fabritsio Romano polyak boshqa klub – «Al-Ahli»ga o‘tishga yaqin ekanini aytmoqda. Xabar qilinishicha, muzokaralar yakuniy bosqichda, futbolchi bilan shaxsiy shartnoma esa allaqachon kelishib bo‘lingan.