Farg‘ona vodiysida «Arablar shaharchasi» barpo etilishi mumkin

Saudiyalik tadbirkor O‘zbekiston turizm infratuzilmasini rivojlantirishga sarmoya kiritmoqchi.

Foto: Kun.uz

O‘zbekistonning Jidda shahridagi Bosh konsulxonasi turizm infratuzilmasini rivojlantirishga xorijiy investitsiyalarni jalb qilish maqsadida, Toif shahridagi tadbirkorlardan biri Yusuf Turkistoniy bilan uchrashuv o‘tkazdi.

Suhbat davomida O‘zbekistonda amalga oshirilayotgan keng ko‘lamli o‘zgarishlar, iqtisodiyotni liberallashtirish va tashqi savdoni rivojlantirish yo‘lidagi islohotlar, xorijiy investorlar uchun yaratilgan biznes-qulayliklar haqida ma’lumot berildi.

O‘z navbatida, Yusuf Turkistoniy O‘zbekistonda biznesini kengaytirish harakatida ekanligini ma’lum qildi. Jumladan, ayni paytda u Farg‘ona vodiysida «Arablar shaharchasi» nomli turistik dam olish maskanini barpo etishni rejalashtirmoqda.

Suhbatdoshning ta’kidlashicha, ushbu turistik maskanni Farg‘ona shahri va Chimyon sanatoriysi o‘rtasidagi adirliklarda, 15 gektar yer maydonda barpo etish mo‘ljallanmoqda. Loyihaning umumiy qiymati qariyb 3 million dollarni tashkil etadi.